Texnologiyanın inkişafı işlərimizi asanlaşdırsa da bəzən təhlükəli ola bilir. Kimiləri bundan məsum məqsədlərlə istifadə edərkən bəziləri real görünən amma saxta olan videolar hazırlayır. Bu videolar Deepfake texnologiyası vasitəsilə hazırlanır. İlk dəfə 2017-ci ildə sosial mediada məşhurlaşan videolar vasitəsi ilə biz Deepfake ilə tanış olmuşduq. Bu gün isə Intel şirkəti Deepfake texnologiyalarını 96% dəqiqliklə aşkarlayan dedektoru təqdim edib. Tərtibatçılar iddia edir ki, FakeCatcher 96% dəqiqliyə malikdir və innovativ fotopletismoqrafiyadan (PPG) istifadə edərək bu texnologiya ilə yaradılan saxta simaları rahatlıqla təyin edə bilir.
Qeyd edək ki, Deepfake texnologiyalarını 96% dəqiqliklə aşkarlaya bilən Deepfake dedektoru, Intel Labs-ın Baş Elmi Mütəxəssisi olan İlke Dəmir və Nyu York Dövlət Universitetinin əməkdaşı Umur Çiftçi-nin birgə fəaliyyəti nəticəsində hazırlanıb. Həmçinin dedektor Intel şirkətinin aparat və proqram təminatından istifadə edir və veb platforma vasitəsilə işləyir. Şirkətin iddiasına görə, bu dedektor digər dedektorlardan fərqli olaraq canlı toxumada qan damarlarının üzdə əks olunan işıq miqdarını ölçmək üçün PPG-dən istifadə edir. PPG, ürək qan vurduqca rəngini dəyişən damarlardakı siqnalları ölçərək videonun saxta olub-olmadığını müəyyən edir. Qeyd edək ki, PPG siqnalları əvvəllər Deepfake texnologiyasına tətbiq edilməyib. Deepfake texnologiyalarını yüksək dəqiqliklə aşkarlayan detektor PPG siqnallarını üzün 32 nöqtəsində toplayır və onları məkan zaman xəritəsinə çevirir, bundan sonra isə videonun həqiqi olub-olmaması barədə qərar verir.
Lakin bu üsul çox keyfiyyətsiz videolarda yenə də effektiv olmayan nəticələr verə bilər. Ümumiyyətlə Deepfake texnologiyaları müasir dövrdə bütün dünyada artan təhlükə hesab olunur. Bəzi mənbələr iddia edir ki, şirkətlər bu texnologiya ilə mübarizə aparmaq üçün kibertəhlükəsizlik aparatlarına və proqramlarına bu vaxta qədər 188 milyard dollar xərcləyib.
