Microsoft şirkətinin ən son təqdim etdiyi əməliyyat sistemi olan Windows 11 indi USB4 2.0 dəstəyinə sahib olur. Belə ki, indi yeni texnologiya ilə istifadəçilər 80Gbps sürət ilə məlumat ötürmək imkanı əldə edəcək. Ümumiyyətlə Microsoft daim olaraq Windows 11 istifadəçilərinin sayını artıra bilmək üçün yeni texnologiyaları əməliyyat sisteminə əlavə edir. Belə ki, ötən aylarda texnologiya nəhəngi süni intellekt əsaslı Copilotu istifadəçilərinə təqdim etmişdi.
Microsoft Windows 11 əməliyyat sistemini ilk təqdim etdiyi günlərdə etdiyi xətaları düzəltməyə çalışır. İndi Windows 11 əməliyyat sistemi 80Gbps məlumat ötürmə sürətinə malik olan USB4 2.0 dəstəyinə sahib olur. Qeyd edək ki, USB Tətbiqçilər Forumu (USB-IF) 2019-cu ilin avqustunda USB4 xüsusiyyətlərini təqdim etmişdi. Məhz bundan iki il sonra isə Windows 11-in ilk versiyasında Microsoft USB4 dəstəyini təqdim etdi. 2022-ci ilin sentyabr ayında isə 80 və 120Gbps ötürmə sürətinə imkan verən USB4 2.0 təqdim edilmişdi. Microsoft təxminən 1 il yarım sonra əməliyyat sistemini ən son USB texnologiyası ilə təmin edir.
Microsoft bildirib ki, USB4 2.0 80Gbps əvvəlcə Intel-in bu yaxınlarda təqdim etdiyi 14-cü nəsil HX seriyalı mobil prosessorları ilə təchiz edilmiş müəyyən cihazlarda mövcud olacaq. Qeyd edək ki, bu cihazlara nümunə olaraq Razer Blade 18-i misal çəkə bilərik. Microsoft-un Windows Insider səhifəsində ətraflı göstərildiyi kimi, build 23615, USB ötürmə sürətini ikiqat artıracaq. Yəni ötürmə sürəti 40Gbps-dən 80Gbps-ə qədər artacaq. Microsoft həmçinin Windows Insider səhifəsində Windows 11 build 23615 ISO faylını da dərc edib.
