Google Cənubi Amerika və Asiya-Sakit okeanı birləşdirən ilk okeanaltı internet kabeli layihəsini elan edib. 400 milyon dollar dəyərində olan Humboldt layihəsində 14 min 800 kilometrlik kabel xətti qurulacaq. Beləliklə amerikalı texnologiya nəhəngi indi Sakit okeanı regionunda internet bağlantılarının etibarlılığı və çevikliyini təmin etmək üçün yeni okeanaltı kabel çəkir. Qeyd edək ki, layihə Google şirkəti ilə yanaşı dövlət təşkilatları və investisiya fondları arasındakı əməkdaşlıq nəticəsində reallaşacaq.
Google Çilinin infrastruktur fondu Desarrollo País of Chile və fransanın Telecommunications of French Polynesia qurumu, o cümlədən digər tərəfdaşlarla birlikdə Avstraliya və Çilini Sakit okeanı vasitəsi ilə birləşdirən 14800 km uzunluğundakı okeanaltı internet kabeli layihəsini elan edib. Google bildirir ki, Humboldt adı verilən bu layihə Cənubi Amerika ilə Asiya-Sakit okeanı birləşdirən ilk birbaşa kabel marşrutu layihəsidir. Ümumiyyətlə Çili hökuməti 2016-cı ildən Cənubi Amerika ilə Asiya-Sakit Okean regionu arasında birbaşa fiber optik əlaqə üzərində işləyir. Humboldt layihəsinin isə 2026-cı ilə qədər tamamlanacağı gözlənilir.
Layihənin rəsmi səhifəsinə görə, Humboldt mövcud telekommunikasiya şəbəkələrinə daha çox müxtəliflik və çeviklik ilə yanaşı ehtiyat imkanı da təmin edəcək. İnternet tutumunun artırılması və gecikmənin yaxşılaşdırılması 5G kimi yeni telekommunikasiya texnologiyaları ilə yaranan trafik artımının idarə edilməsində əsas rol oynayacaq. Google şirkətinə görə yeni kabel layihəsi həmçinin yeni iş yerlərinin yaradılması baxımından da, əhəmiyyətli iqtisadi artıma təkan verəcək.
