ASUS şirkəti dünyanın ilk Dimensity 9000+ çipseti ilə təchiz edilmiş oyun smartfonunu təqdim etdi. Belə ki, ROG Phone 6D seriyası elə 2 ay əvvəl çıxarılmış ROG Phone 6 seriyası ilə çipset və cüzi təkmilləşdirmələr xaricində heç cür fərqlənmir. Smartfonların sonundakı “D” hərfi isə Dimensity seriyası çipsetlərə işarə edir.
Təkmilləşdirmə GameCool 6 adı verilən termal vəziyyəti 20% yaxşılaşdıran yenilik tərəfində özünü göstərir. Ayrıca olaraq 6D Ultimate modelinə AeroActive Portal adlı qapaq quraşdırılıb ki, soyuducu pəri smartfonun arxasına taxdıqda birbaşa həmin yuvadan cihazın termal lövhəsinə fiziki olaraq təmas edərək soyutmanı daha effektiv təmin edir.
Həm ROG Phone 6D, həm ROG Phone 6D Ultimate öz gücünü Dimensity 9000 çipsetindən alır. ROG Phone 6 seriyasında olduğu kimi ROG Phone 6D seriyasında da aktiv soyutma sistemi mövcud deyil. Ona görə də istehsalçı smartfonların 10°C-ə qədər daha sərin işləməsinə imkan yaradan xüsusi soyuducu pərləri bu modellərlə də istifadəyə verir. 6D Ultimate modelindəki arxa ekran daha funksional olub batareya vəziyyəti, zənglər, bildirişlər kimi çeşidli imkanlara nəzarət etməyi asanlaşdırır. 6D isə sadəcə ROG imzalı RGB loqotipi xüsusiləşdirmə imkanı tanıyır. Hər iki cihazın sağ və arxa hissələrində AirTrigger adı verilən oyun tətikləri (sensorları) yerləşdirilib
Cihazlara 6.78 düymlük FHD+ təsvir ölçülü Samsung istehsalı AMOLED ekran quraşdırılıb. Ekran panellərinin tezliyi xatırlayırsınızsa, ROG Phone 6 seriyasında olduğu kimi 165Hz təşkil edir. İstəyə görə 60Hz, 90Hz, 120Hz, 144Hz olmaqla sabitlənə bilər. Lakin adaptiv dəyişməsi mümkün deyil. Sensor tezliyi 165Hz olub, zərbələrə qarşı Corning Gorilla Glass Victus ilə qorunur.
Smartfonların sol üstündə yerləşdirilən kamera modulu daxilində 50MP IMX766 baş sensoru, 13MP ultra-geniş bucaqlı sensor, 5MP makro sensorları yer alıb. Selfi kamerası 12MP təşkil edir.
ROG Phone 6D seriyası iki hüceyrəli 6000mAs batareyaya malikdir. Smartfonların alt və sol tərəflərində 2 ədəd Type-C girişi yerləşdirilib. 65 Vt sürətli doldurma dəstəkləyirlər. Smartfonların qiyməti isə ehtimal etdiyiniz kimi xeyli yüksəkdir. 6D Ultimate modeli qlobal bazarda 16-512GB yaddaşa sahib tək variantı ilə 1.399 avroya təklif edilir. Sadə 6D modeli isə 12GB operativ yaddaş, 256GB yaddaş həcmi ilə 949 avroya satılır.
