iPhone 15 seriyasının təqdimatına cəmi bir neçə ay qalsa da, iPhone 16 Pro seriyası haqqında bəzi ekran detalları məlum olub. Display Supply Chain Consultants analitiki Ross Young iddia edir ki, iPhone 16 Pro və iPhone 16 Pro Max modelləri sələflərindən daha fərqli ekranlara sahib olacaqlar. Ross Young bu barədə mayin 23-də Los-Ancelesdə keçiriləcək tədbirdə daha ətraflı şəkildə açıqlama edəcəyini də bildirib. Ümumiyyətlə hər il yeni iPhone təqdim edilmədən öncə onun davamçısı barədə detallar ortaya çıxır. Maraqlısı budur ki, bu iddiaların çoxu gerçəkləşir.
Ross Young iPhone 16 seriyasının Pro modellərinin ekran ölçüləri barədə məlumatlar versə də, sadə iPhone 16 və iPhone 16 Plus modelləri barədə heç bir şey qeyd etməyib. Young-a görə iPhone 16 Pro modeli 6.3 düymlük, iPhone 16 Pro Max modeli isə 6.9 düymlük ekrana sahib olacaq. Bu da o deməkdir ki, gələn il təqdim ediləcək iPhone modeli ən böyük ekrana malik iPhone olacaq. 2024-cü ildə təqdim edilməsi gözlənilən iPhone 16 Pro və iPhone 16 Pro Max modellərinin ekranlarının tezliyi və təsvir ölçüsü barədə detallar yaxın günlərdə keçiriləcək tədbirdə açıqlanacaq.
Hal-hazırda bazarda olan iPhone 14 Pro və iPhone 14 Pro Max modelləri müvafiq olaraq 6.1 və 6.7 düym ekranlara malikdir. Bu il təqdim edilməsi gözlənilən iPhone 15 Pro modellərinin ekran ölçülərinin dəyişməyəcəyi bildirilir. Görünən odur ki, Apple şirkəti iPhone 16 Pro modellərini ən böyük ekran panelinə malik iPhone edəcək.
