Apple şirkəti 1 illik aradan sonra yeni iPhone və Apple Watch seriyasını təqdim etdi. Beləliklə ötən gün keçirilən Wonderlust tədbirində Apple yeni iPhone 15 seriyası modellərini yəni, iPhone 15, 15 Plus, 15 Pro və Pro Max təqdim etdi. Bundan əlavə texnologiya nəhəngi tədbirə yeni Apple watch S9 modellərini təqdim etməklə başlayıb. Əslində ötən gün keçirilən tədbir də gözlənilməyən və təəccüblü yenilik olmadı. Çünki bu dəfə Apple analitikləri hər bir detalı bizə xəbər vermişdilər. Gözlənildiyi kimi yeni iPhon 15 modelləri USB-C giriş portuna sahib olub. Habelə USB-C ilə artıq aksesuarlarınızı da telefonunuzdan şarj edə biləcəksiniz. Gəlin görə yeni iPhone 15 və iPhone 15 Plus modelləri hansı yeniliklərə və təkmilləşdirmələrə sahib olub?
Apple şirkətinin yeni iPhone 15 və iPhone 15 Plus modelləri hansı yeniliklərə sahibdir?
İlk öncə onu qeyd edək ki, artıq iPhone 15 və 15 Plus modelləri dinamik ada ilə təchiz edilib. iPhone X seriyasından bəri istifadə olunan dizayn artıq tarixə qovuşdu. Habelə artıq yeni modellərin künc kəsimi daha yuvarlaqdır. Əslində bir baxımdan bu dizayn iPhone 11 modellərini xatırladır. Ümumi olaraq isə iPhone 15 sələfindən demək olar ilk baxışda fərqlənmir. Sadəcə yan tərəfdən baxdıqda kameranın daha qalın dizayna sahib olduğunu görə bilərik. Bundan əlavə yeni modellərin ölçüsü də dəyişmədi və 6.1 düymdə sabit qaldı. Always On Display dəstəkləməyən 2556×1179 piksel təsvir ölçülü OLED ekranın parlaqlığı isə artıq 1600 nitə çatır və yenilənmə tezliyi 60 Hz-də sabit olaraq qalır. Müqayisə üçün deyək ki, iPhone 14 modelində bu göstərici sadəcə 800 nit idi. A16 Bionic çipseti ilə təchiz edilən iPhone 15 və Plus modelləri indi 5 fərqli mavi, çəhrayı, sarı, yaşıl və qara rənglərdə bizlərə təklif olunur.
Kamera tərəfində isə təbii ki, təkmilləşdirmələr mövcuddur. Beləliklə Apple şirkətinin yeni iPhone 15 və iPhone 15 Plus modelləri 48 MP əsas kamera sensoruna sahib olub. Bundan əlavə isə f/2.4 12 MP ultra genişbucaqlı kamera sensoru dəyişməz olaraq qalıb. Yeni iPhone 15 və 15 Plus modelləri əslində bizə çox yenilik təklif etmir. Çünki telefoto optiki də 2X-də sabit qalır. Sadəcə yenilik ondan ibarətdir ki, artıq portre rejimində şəkil çəkmək daha asandır, yəni iPhone avtomatik olaraq portre rejimine keçid edə bilir.
Funksiyalar tərəfində isə yeni modellər təkmilləşdirmə alıb. Həmçinin səs izoliyasiyası funksiyası ilə AirPods modellərində olduğu kimi daha səs-küylü yerlərdə rahatlıqla danışmaq olacaq. 6-128GB, 6-256GB, 6-512GB yaddaş seçimləri ilə təklif olunan smartfon sələfindən sadəcə 1 qram yüngüldür və çəkisi 171 qramdır. Batareya tərəfində isə iPhone 15 modeli 3877 mAs, iPhone 15 Plus modeli isə 4912 mAs həcmə sahib olub. Onu da qeyd edək ki, smartfonların başlanğıc qiymətləri müvafiq olaraq 799$ və 899$-dır.
Yeni flaqman iPhone 15 Pro və Pro Max modelləri hansı yeniliklərə sahibdir?
iPhone 15 və 15 Plus modelləri bizlərə elədə çox yenilik təklif etməsə də, Apple seriyanın flaqman modelləri üçün bir neçə yenilik edib. Belə ki, elə dizayn baxımından yeni iPhone 15 Pro modeli sələflərindən fərqlənir. Artıq smartfona action düyməsi əlavə edilib. Dinamik ada dizaynı hələ də dyişməyib. Lakin ekran çərçivələri biraz daha nazikləşib. O cümlədən Apple bu il titanium korpusa malik iPhone 15 Pro və Pro Max istehsal edəcək. Qeyd etdik ki, yeni flaqman modelə action düyməsi əlavə edilib. Bu düymə isə iphone modellərini səssizə almağa yarayan switch düyməsini əvəz edəcək. Əlavə olaraq da istifadəçilər Action düyməsi üçün istədikləri funksiyanı aktivləşdirə bilər. Təbii ki, yeni flaqman modellər də USB-C ilə bizlərə təklif olunur.
iPhone 15 pro modeli bu dəfə 6.1 düymlük və 120 Hz yenilənmə tezliyinə sahib OLED ekran ilə təchiz edilib. İlk dəfə iPhone 14 Pro modelləri ilə bizlərə təklif edilən Always on Display funksiyas; bu modellər üçün də əlçatandır. Performans tərəfində Apple bu modelini dünyanın ən sürətli smartfonu olaraq qələmə verir. Buna səbəb isə təbii ki. yeni A17 Pro çipsetidir. Maraqlısı budur ki, A17 çipseti barədə məlumat yoxdur. Apple ilk dəfə olaraq Pro seriyalı çipsetə də keçid etdi. Qeyd edək ki, bu çipset 3nm dizayna malikdir. Hebelə bu çipset ilə yeni 15 Pro modeli sələfindən 15 faiz daha sürətli olacaq. Enerji istehlakı isə bu çipsetdə 30% azaldılıb. Onu da qeyd edək ki, 15 Pro modeli sələfindən 19 qram daha yüngüldür. Həmçinin yeni çipsetin tərkibində 19 milyard tranzistor var və 6 nüvəli konfiqurasiyadan istifadə edir. Yeni çipset ilə birlikdə RT yəni Ray-Tracing dəstəyi də əlavə edildi. Həmçinin oyun tərtibatçıları üçün AV1 Decoding dəstəyi də artıq əlçatandır. Görünən odur ki, Apple oyun həvəskarlarını da ələ almaq istəyir.
Kamera tərəfində isə Apple hər il olduğu kimi, bu ildə inanılmaz təkmilləşdirmələr edib. Lakin yenə də 15 Pro və Pro Max modelləri 48 MP əsas, 12 MP genişbucaqlı və 12 MP telefoto sensorlarına sahib olub. Selfie kamerası da sabit olaraq 12MP qalıb. Sadəcə bir yenilik mövcuddur ki, artıq telefoto kamerası 3X optik yaxınlaşdırma edə bilir. Lakin bu sadəcə iPhone 15 Pro üçün keçərlidir. Apple ilk dəfə olaraq kamera tərəfində 15 Pro və Pro Max modellərini ayırıb. Bu dəfə 15 Pro Max modeli 5x 120mm periskopik-telefoto ilə təchiz edilir. Daha bir yenilik isə artıq ProRes ilə 60 FPS videolar qeydə almağın mümkün olmasıdır. O cümlədən yeni iPhone 15 pro seriyası 20 Vatt şarj sürəti təklif edir. Qiymət tərəfində isə iPhone 15 Pro 999$, iPhone 15 Pro Max isə 1199$ başlanğıc qiymətinə sahib olub.
