5 iyun tarixində baş tutacaq Apple WWDC 2023 tədbirindən əvvəl texnologiya nəhəngi iOS 17 ilə gələcək bəzi xüsusiyyətləri təqdim edib. Belə ki, texnologiya nəhəngi iOS 17 ilə iPhone modellərinə gələcək yeni əlaçatanlıq xüsusiyyətlərini təqdim edib. Ümumiyyətlə Apple hər il əlçatanlıq xüsusiyyətlərində yenilik etməyi ilə seçilir. Texnologiya nəhəngi hər il daha fərqli və daha yeni xüsusiyyətləri istifadəçilərə təqdim edir. Bu dəfə isə Apple danışa bilməyən və ya danışma qabiliyyəti çox zəif olan insanlar üçün yeni xüsusiyyətlər təqdim edib.
iOS 17 ilə gələcək əlçatanlıq xüsusiyyətləri hansılardır?
Apple şirkətinin iOS 17 ilə birlikdə təklif edəcəyi əlçatanlıq xüsusiyyətləri arasında köməkçi interfeys funksiyası yer alır. Belə ki, bu funksiya ekranda yalnız lazımi tətbiqləri göstərməklə deyil, tətbiqlərin seçilməsini asanlaşdırmaqla idrak zəifliyi olan insanlara kömək edəcək. Yeni funksiya interfeysdə kontrastı yüksək olan düymələrədən və mətn etiketlərindən istifadə edir. Vizual olaraq ünsiyyət qurmağı üstün tutan istifadəçilər üçün Mesajlar tətbiqində yalnız emoji klaviaturası və video mesajları göndərmək seçimləri təklif olunur. Digər xüsusiyyətlərdən biri də məhz Live Talk-dır. Bu funksiya bütün iOS modellərində istifadəçilərə telefon zəngləri və Face Time zəngləri zamanı bəzi ifadələri yazmağa imkan verir. Bu funksiya ilə ALS diaqnozlu insanlar mətni səsə çevirərək öz səslərinə yaxın bir səsdən istifadə edə biləcəklər.
Həmçinin kar və ya eşitmə qabiliyyəti zəif olan istifadəçilər iPhone üçün yaradılan eşitmə cihazlarını birbaşa olaraq Mac modellərinə konfiqurasiya edərək qoşa biləcəklər. Səs ilə idarəetmə əmrlərinin sayı daha da artırılıb. Bununla isə istifadəçilər daha çox əmrdən istifadə edərək smartfonlarından istifadə edə biləcəklər. Görmə qabiliyyəti zəif olan istifadəçilər artıq mətn ölçüsünü daha rahat tənzimləyə biləcək. Bundan əlavə olaraq isə animasiyalara həssas olan istifadəçilər Safari brauzerində və mesajlarda hərəkətli şəkilləri avtomatik olaraq dayandıra biləcəklər. Həmçinin VoiceOver istifadəçiləri üçün Siri səsləri daha təbii hala gətirilib. Bütün bunlar Apple şirkətinin iOS 17 ilə təqdim edəcəyi əlçatanlıq xüsusiyyətləri arasındadır. Yaxın günlərdə baş tutacaq tədbirdə daha ətraflı məlumat veriləcək.
