ChatGPT süni intellekt aləti insanları həyatını asanlaşdırsa da bəzi mənfi cəhətləri də var. Belə ki, ChatGPT süni intellekt alətinin serverləri enerji sərfiyyatı ilə yanaşı soyutma üçün hədsiz dərəcədə çox su tələb edir. Ümumiyyətlə mütəxəsisləri GPT-4 və Midjourney kimi süni intellekt alətlərinin bir çox təhlükələrindən danışsa da, bu məqama diqqət etmirlər. Bəlkədə yaxın illərdə süni intellekt alətləri səbəbindən qlobal su problemi meydana gələcək və insanlar şirin su uğrunda yarışacaq. The Register bildirir ki, elm adamları gələcəkdə məlumat mərkəzlərini soyutmaq üçün daha çox suya ehtiyac yaranacağını proqnozlaşdırırlar.
ChatGPT, Midjourney kimi süni intellekt alətlərinin çoxlu su istehlakı məhz UC Riverside və Texas universiteti alimlərinin diqqətini çəkib. Onların araşdırmalarına görə GPT-3 səviyyəsinin öyrənilməsinə görə təxminən 700 min litr su tələb olunur. Bu isə 320 Tesla elektromobilinin istehsalında istifadə olunan su miqdarıdır. Bu hesablamara görə süni intellekt çatbotu 20-50 sualı cavablandırmaq üçün təxminən 500 ml su istehlak edir. Alimlər bildirir ki, süni intellekt alətlərinin məlumat mərkəzlərinin soyudulması optimallaşdırılmasa gələcəkdə bu rəqəmlər daha da artacaq. Xatırladaq ki, texnologiya nəhəngləri məlumat mərkəzlərindəki cihazların sayını gün keçdikcə artırır. Bu da o deməkdir ki, yüksək tələbat daha çox su istehlakına səbəb olur.
Ümumiyyətlə texnologiya nəhəngləri artıq ChatGPT kimi süni intellekt alətlərinin su istehlakı barədə məlumat paylaşmaqdan çəkinirlər. Alimlər bildirir ki, problem süni intellekt alətlərində deyil, onların istilik idarəetmə sistemlərindədir. Əgər şirkətlər bu sistemləri optimallaşdıra bilsə su istehlakı ciddi dərəcədə azalar. Microsoft ötən ay etiraf etmişdi ki, məlumat mərkəzi məhz su ilə soyudulur, lakin bu sistemlər daha çox güc istifadə edir. Alimlər həll yolu kimi yalnız istilik sistemlərinin optimallaşdırılmasını deyil məlumat mərkəzlərinin daha soyuq ərazilərdə quraşdırılmasını təklif edir. Ümumiyyətlə şirkətlər süni intellekt alətlərinin həm enerji sərfiyyatını həm də su istehlakını optimallaşdırmalıdır.
