Hal-hazırda dünyada ən çox istifadə olunan Snapdragon prosessorları istifadəçilərin şəxsi məlumatlarını deşifrə edərək Qualcomm şirkətinə ötürürmüş. Belə ki, İnformasiya təhlükəsizliyi sahəsində fəaliyyət göstərən Nitrokey şirkəti Snapdragon prosessorları ilə təchiz edilən smartfonlarda istifadəçi məlumatlarının deşifrə edilərək Qualcomm şirkətinə göndərildiyini bildirib. Hətta bu məlumatlar heç bir icazə alınmadan və şifrələnmə olmadan göndərilir. Bildiyimiz kimi, ölkəmizdə və dünyada istifadə olunan bir çox android tipli smartfonlar həm keyfiyyət həm də performans cəhətdən daha üstün olduğu üçün Snapdragon prosessorları ilə təchiz olunur. Lakin məlum oldu ki, bu prosessorlar nə qədər keyfiyyətli və performanslı olsa da bir o qədər təhlükəlidir. Nitrokey şirkətinin mütəxəssisləri bildirir ki, Snapdragon prosessorları Android əməliyyat sisteminin istənilən qorunma mexanizminin öhdəsindən gələrək məlumatların göndərilməsini reallaşdırırlar.
Qeyd edək ki, mütəxəssislər bu halı Sony Xperia XA2 smartfonunda sınaqdan keçiriblər. Belə ki, onlar ilk öncə smartfona /e/OS əməliyyat sistemini quraşdırıblar. Bu əməliyyat sistemi Android-in açıq mənbə koduna sahib təkmilləşdirilmiş versiyasıdır. Bu versiyanın əsas üstünlüyü məhz konfidensiallıq ilə bağlıdır. Yəni bu sistemdə Google servisləri mövcud deyil. İkinci mərhələdə mütəxəssislər cihaza SİM kart daxil etməyib və GPS funksiyasını aktivləşdirməyib. Cihaz yalnız nəzarət olunan Wi-Fi şəbəkəsinə qoşulub. Bu şəbəkə də öz növbəsində Wıreshark adlı proqram təminatı vasitəsi ilə test edilib. Ən maraqlısı odur ki, smartfon ilk növbədə android.clients.google.com hostuna sorğu göndərib. Hansı ki, cihazda Google servis tətbiqi olmayıb.
Sınaq nəticəsində məlum olub ki, smartfon izatcloud.net domeninə sorğular göndərir. Adı çəkilən domen isə birbaşa olaraq Qualcomm şirkətinə məxsusdur. Beləliklə mütəxəssislər Snapdragon prosessorlarının istifadə məlumatlarını deşifrə etməsini aşkar edib. Lakin bir məqamda ondan ibarətdir ki, domenə göndərilən sorğular HTTP protokolu üzərindən göndərilib. Burada ötürülən məlumatların hackerlər tərəfindən ələ keçirilməsi ehtimalı çox yüksəkdir. Deşifrə olunan məlumatlar arasında smartfonun unikal identifikatoru, smartfonun sahib olduğu prosessorun seriya nömrəsi, XTRA proqram təminatının versiyası, ölkə kodu, əməliyyat sisteminin növü, smartfonnun modeli, smartfona quraşdırılmış tətbiqlərin siyahısı, IP ünvanı var.
