CES 2023 sərgisi başlamamışdan 1 həftə əvvəl, Samsung şirkəti özünün qəribə bir məişət texnikasını təqdim edib. Belə ki, bundan əvvəl LG şirkəti oxşar bir məhsulla bazara çıxmışdı. Əgər xatırlayırsınızsa, söhbət LG MoodUP seriyası soyuducularından gedir. IFA 2022 sərgisində nümayiş etdirilən həmin soyuducuların ən əsas xüsusiyyəti rəng dəyişə bilən olması idi. Lakin heyif ki, həmin modelin səthindəki LED işıqlar ekran funksiyası yerinə yetirmirdi. İndi isə Samsung şirkəti birbaşa 32 düymlük ekranla təchiz edilən Bespoke Refrigerator Family Hub Plus soyuducu modeli ilə qarşımıza çıxıb.
Samsung şirkətinin hazırladığı soyuducu əslində, sözün əsl mənasında televizora malikdir
32 düymlük sensor ekranlı soyuducu bir çox interaktiv xüsusiyyəti özündə birləşdirir. Bu qədər böyük ekranda istəsəniz TikTok üzərindən videolara baxa, istəsəniz YouTube Short videolarını izləyə, ya da Instagram tətbiqinə girib istədiyinizi edə bilərsiniz. Bunun səbəbi isə soyuducunun Android əsaslı olduğu təxmin edilən əməliyyat sistemi ilə təchiz edilməsidir. Bespoke Refrigerator Family Hub Plus soyuducusu SmartThings xüsusiyyətini dəstəkləyir ki, soyuducunun ən əsas xüsusiyyəti əşyaların interneti ilə evdəki bütün ağıllı cihazları tək yerdən idarə edə biləsiniz.
Lakin çoxları hələ buna hazır olmadığından Samsung bu soyuducusunda əşyaların interneti əvəzinə, sahib olduğu televizor xüsusiyyəti ilə daha çox diqqətləri çəkə bilər. Samsung TV Plus tətbiqini dəstəkləyən bu soyuducu televizor kimi işləmək üçün internet bağlantısında istifadə edir. Yəni bir növ IPTV dəstəyinə malikdir. Soyuducunun qiymətinə gəldikdə, təqdimatı CES 2023 sərgisində baş tutacağından bununla bağlı heç bir məlumat verə bilmirik. Buna baxmayaraq qiymətin olduqca yüksək səviyyədə olacağını təxmin etmək elə də çətin deyil.
