ABŞ-ın lüks elektromobil istehsalçısı Lucid çətin günlər yaşayır. Belə ki, istehsalını artırmaqda çətinlik çəkən şirkət bu rübdə cəmi 1550 avtomobil istehsal edə bilib. Şirkətin səhmləri isə gün keçdikcə dəyərsizləşir. Hətta Bloomberg-in hesablamalarına görə Lucid istehsal etdiyi hər elektromobili üçün 338 min dollar itirir və iflasa doğru addımlayır. Qeyd edək ki, şirkət bu rübdə istehsal etdiyi 1550 elektromobilin sadəcə 1457 ədədini müştərilərə çatdıra bilib.
Ümumiyyətlə əvvəlki rüb ilə müqayisədə şirkətin tədarüklərinin sayı bir qədər artsa da, istehsal prosesi yavaşlayıb. Qeyd edək ki, şirkət ötən rübdə 2173 elektromobil istehsal edə bilmişdi. Hələlik istehsalın niyə bu qədər yavaşlaması isə məlum deyil. Şirkət rüblük hesabatı açıqladıqdan sonra səhmləri 7.2% ucuzlaşıb. Hətta şirkətin səhmləri ilik əvvəlindən bu yana 25% dəyər itirib. Bu azalmanın səbəbi təkcə istehsal problemləri deyil, həm də istehsal etdiyi hər bir Lucid Air avtomobilinə görə şirkətin pul itirməsidir. Bloomberg mənbəsinə görə Lucid istehsal etdiyi hər elektromobil üçün 338 min dollar itirir.
Maraqlısı budur ki, ABŞ-ın digər elektrikli avtomobil istehsalçısı Rivian da hər bir avtomobildən 33 min dollar itirir. Bununla belə Lucid indi daha acınacaqlı vəziyyətdədir. Çünki, şirkətin səhmləri pik həddən tam 91% aşağı düşüb. Habelə şirkətin borclarını ödəyə bilməməsi riski də artıb. İnvestor Jerry Braakmanın sözlərinə görə, şirkət bu il 10 min avtomobil istehsal edə bilməsə, pul itirməyə davam edəcək.
