Hindistanın Elektronika və İnformasiya Texnologiyaları, Dəmir Yolları və Rabitə naziri Ashwini Vaishnaw bildirib ki, Hindistan qarşıdakı 5 ildə qlobal çip mərkəzi olmaq üçün işə qoyulub. Ümumiyyətlə, yarımkeçirici çip istehsalının əhəmiyyəti artır. Bəzilərinin fikrincə, çip istehsalını və ya tədarükünü təmin edə bilməyən ölkələri ciddi problemlər gözləyir. Bunun fərqində olan Hindistan aqressiv yanaşma ilə 5 il ərzində qlobal çip mərkəzlərindən birinə çevrilməyi hədəfləyir.
Elektronika və informasiya texnologiyaları, dəmir yolları və rabitə naziri Ashwini Vaishnaw, çip sənayesinin çox mürəkkəb bir bazar olduğunu və Hindistanın yaxın 5 ildə dünyanın ən yaxşı beş yarımkeçirici ölkəsi arasında olacağını düşündüyünü bildirib. TrendForce bazar təhlili firmasının dekabr ayına olan məlumata görə, Tayvan 46 faizlə qlobal yarımkeçirici sənayesində istehsal gücünə liderlik edir. Məhz bu nəticənin əldə olunmasında isə Tayvan mərkəzli TSMC şirkəti əsas rola malikdir. Qeyd edək ki, Tayvandan sonra 26%-lə Çin, 12% ilə Cənubi Koreya, 6% və 2% ilə isə müvafiq olaraq ABŞ və Yaponiya gəlir.
İndiki şəraitdə görünən odur ki, ABŞ və Çin arasında gərginlik davam edəcək və ya ən azından Şərqi Asiya ölkəsinin üzərindən yarımkeçirici sanksiyalar aradan qaldırılmayacaq. Bu, Çinin yeni investisiyalar cəlb edə bilməyəcəyi mənasını versə də, Hindistan kimi ölkələrin bundan faydalana biləcəyini göstərir. Əslində Hindistan artıq müəyyən investisiyalar cəlb etməyə başlayıb. Keçən həftə Baş nazir Narendra Modi üç yarımkeçirici fabrikinin açılışını etdi. Bu fabriklərdən biri Tata Electronics və Tayvanın PSMC şirkətlərinin birgə açdığı müəssisədir. PSMC, hədəfin 2026-cı ilə qədər Hindistanın ilk yarımkeçirici çipini istehsal etmək olduğunu bildirib.
