Microsoft şirkətinin qurucusu və milyarder iş adamı Bill Gates bu il ilə bağlı təəssüratlarını, o cümlədən 2024-cü ildən gözləntilərini paylaşıb. Artıq 2023-cü ilin bitməsinə 2 həftədən az qalıb. Bir çox platforma və şirkət bu ilə olan statistik göstəricilərini istifadəçiləri ilə paylaşmağa başlayıb. Habelə istifadəçilər də texnologiya nəhənglərini mənfi və müsbət cəhətdən qiymətləndirməyə başlayıblar. Dünyanın ən nüfuzlu şəxslərindən biri olan Bill Gates indi bu il ilə bağlı öz təəssüratlarını paylaşıb.
Məşhur milyarder bununla bağlı öz internet səhifəsində bloq dərc edib. Belə ki, dərc edilən bloq yazısına görə Bill Gates-in 2024-cü ildən böyük gözləntiləri var. İlk olaraq Gates bu il baba olmaqdan duyduğu xoşbəxtliyi və daha sonra 2023-cü il üçün öz müşahidələrini məqaləsində bölüşüb. Süni zəkanın gələcəyi necə formalaşdıracağını görmək imkanımız olduğunu deyən Gates, süni intellektin gətirdiyi dəyişikliyi internetin ilk ortaya çıxdığı illərdə yaratdığı dəyişikliyə bənzədib. Daha sonra bu il baş verən müharibələri, iqlim dəyişikliyinin yaratdığı fəlakətləri, yüksək inflyasiya və aşağı iqtisadi artımı vurğulayarkən, hələ də müsbət düşünməyə davam etmək istədiyini ifadə edib.
Bill Gates bu il başverənlərdən əlavə olaraq 2024-cü ildən gözləntilərini də internet səhifəsində paylaşıb. Belə ki, onun sözlərinə görə “Seçkilər, enerji həlləri və səhiyyədəki inkişaflar həyatımıza təsir edəcək”. TerraPower kimi nüvə enerjisi şirkətlərinə diqqət çəkən Gates, bu qurğularda enerjinin çox daha təhlükəsiz istehsal ediləcəyini və ənənəvi qurğulara nisbətən daha az tullantı əmələ gətirəcəyini ifadə edib. Sağlamlıq sahəsində də mühüm irəliləyişlər gözlədiyini bildirən milyarder, xüsusilə aclıq və piylənmə ilə mübarizədə böyük irəliləyişlərin olacağına inanır.
