Ölkəmizdə ilk dəfə keçirilən Teknofest Azərbaycan festivalına qatılmaq üçün Türkiyənin Sənaye və Texnologiya naziri Mustafa Varank da paytaxt Bakını ziyatət etdi. Azərbaycanın rəqəmsal inkişaf və nəqliyyat naziri Rəşad Nəbiyev Mustafa Varank ilə bir araya gələrək Azərbaycan və Türkiyənin ortaq texnopark yaratması haqqında qərar imzaladı. Festivalda çıxış edən Türkiyə naziri eyni zamanda Türkiyədəki texnoparklar haqqında da məlumat verib.
Ən qısa zamanda fəaliyyətə başlayacağına ümid edirik
Mustafa Varank texnologiyanın inkişaf etdirilməsinin əhəmiyyətindən bəhs edərək Türkiyənin 92 texnopark və 1600-dən çox R&D və dizayn mərkəzinə sahib olduğunu xatırladıb. Bu mərkəzlərin onlara qatdığı bilik və təcrübənin olduqca geniş olduğunu bildirib. Qeyd edilən 92 texnoparkda isə 8 minə yaxın firma fəaliyyət göstərir və indiyədək 7 milyarddan çox ixracat müvəffəqiyyətinə nail olublar. Komandaları isə uzun müddətdir ki, Bakıda texnologiyanın inkişafı zonasının yaradılması üzərində işləyir. O, həmçinin yaradılacaq texnoparkın maraqlı tərəflərinin müəyyən edilməsi, idarəedici şirkətin yaradılması, tədbirin keçiriləcəyi yerin müəyyən edilməsi, inkubasiya mərkəzinin yaradılması, universitetin müəyyənləşdirilməsi ilə bağlı araşdırmaların da aparıldığını bildirib. Mustafa Varank “Bu gün imzalayacağımız qərar ilə texnoparkın ən qısa zamanda fəaliyyətə başlayacağına ümid edirik” sözləri ilə çıxışını sonlandırıb. Sözünü bitirdikdən sonra Rəşad Nəbiyevlə “Texnopark Anlaşma Memorandumu”nu imzalayıb. Qərarın imzalandığı Teknofest festivalı haqqında saytımızdakı məqalədən öyrənə bilərsiniz.
Texnopark nədir? Dünyada ilk texnopark
Texnoparklar universitetlər, tədqiqat qurumları və sənaye təşkilatlarının eyni mühitdə tədqiqat, təkmilləşdirmə və innovasiya işlərini davam etdirdiyi ekosistemlərdir. Bu vasitə ilə qurumlar informasiya və texnologiyaları bir-birlərinə ötürürlər. Dünya tarixindəki ilk texnopark nümunələrinə baxdıqda 1952-ci ilə aid Standford Research Park ilə qarşılaşırıq. Bu texnopark ABŞ-ın Şimali Kaliforniya bölgəsində qurulmuşdur. Dünyadakı ikinci texnopark 1972-ci ildə İngiltərədə yaradılmış Heriot-Watt Universitetidir. 1980-ci ilin sonlarına doğru isə texnoparklar bütün dünyada geniş vüsət aldı və bu gün bir çox ölkələrdə nümunələri var. Bu gün hər hansı bir ölkənin qlobal rəqabət qabiliyyətinin səviyyəsi həmin ölkənin yeni biliklər istehsal etmək qabiliyyəti və texnoloji inkişafı ilə düz mütənasibdir. Belə bir vəziyyətdə də yeni yaradılacaq texnoparkın layihəsinin ölkə üçün nə dərəcədə əhəmiyyətli olduğunu görə bilərik.
