Apple iPhone 14 xətti hər il olduğu kimi sentyabr ayında təqdim ediləcək. Lakin təqdimatın hansı gün baş tutacağı hələ ki, naməlumdur. Bloomberg şirkətinin Apple şirkətindən olan mənbələrinə əsasən, yeni smartfon modelləri 7 sentyabr tarixində tanıdılacaq. Verilən məlumata əsasən, Apple şirkəti bu tarixi daxili yazışmalarında qeyd edib. Təqdimat tədbiri tamamilə onlayn formatda və öncədən çəkilmiş videolar ilə keçiriləcək.
iPhone 14 xətti nə ilə təəccübləndircək?
Bildiyimiz kimi Apple şirkətinin iPhone 14 xətti daxilində 4 model tanıdacaq. Bu modellərə iPhone 14, iPhone 14 Max, iPhone 14 Pro və iPhone 14 Pro Max daxildir. Mini modelindən aşağı satış ədədlərinə görə tamamilə imtina ediblər.
İlkin məlumatlara görə sadə iPhone 14 seriyası təkmilləşdirilmiş 48MP əsaslı kamera sensoru əldə edəcək. Yeniliklər isə iPhone 14 Pro və Pro Max modelləri üzərində cəmləşəcək. Bu modellərdə Apple şirkəti ekran çərtiyindən imtina edəcək. Əvəzinə yeni dizaynlı kapsul istifadə olunacaq. Əlavə olaraq Pro və Pro Max modelləri yeni Bionic A16 çipseti və “Always-on Display” həmişə açıq ekran funksiyalarını almalıdırlar. Qiymət baxımından da bu il artım olması gözlənilir.
Satışa çıxma tarixləri
Bloomberg şirkətinin mənbə məlumatlarına görə, iPhone 14 xətti 9 sentyabr tarixində satışa çıxacaq. İlk cihazlar 16 Sentyabr tarixində istifadəçilərə çatdırılacaq. Aydın məsələdir ki, bu tarixlər ABŞ bazarına aiddir. Digər regionlarda (Azərbaycan daxil) satışa çıxma tarixləri hələ ki, bəlli deyil. Yeni iPhone 14 seriyası ilə yanaşı həmin gün Apple Watch Series 8 ağıllı saatlarının da təqdim olunacağı gözlənilir. Series 8 xətti ilə bərabər yenilənmiş Apple Watch SE və daha güclü Pro variantı tanıdılacaq.
