Apple şirkəti bu dəfə aksesuar satışlarında istədiyi nəticəni əldə edə bilməyib. Belə ki, ABŞ mərkəzli Apple şirkəti məşhur “FineWoven” qoruyucu örtüklərinin istehsalını dayandırmağı qərara alıb. Lakin hələ şirkətdən bu iddia ilə bağlı hər hansı bir məlumat verilməyib. Bununla belə bu örtüklərin həqiqətən bazarda satışlarının elə də çox olmadığını nəzərə alsaq iddianın doğru olmasına inana bilərik.
Ümumiyyətlə, iPhone 15 seriyasının FineWoven və ya Micro Woven qoruyucu örtükləri və digər aksesuarları təqdim edilərkən heç də müsbət rəy əldə etməmişdi. İstifadəçilər məhsulu əsasən Apple şirkətinin bahalı örtüyündən çox Amazondan və ya hər hansı satıcıdan alınmış ucuz bir örtüyə bənzədirdilər. Məhz bu düşüncəni doğuran isə yeni örtüyün keyfiyyətidir. Əksər insanın aldıqdan sonra geri qaytardığı “FineWoven” örtüklərini Apple şirkəti artıq istehsal etməyəcək.
Əsasən karton kimi hissə və ya keyfiyyətə sahib olduğunu bildirən istifadəçilər onun dayanıqlılığından da şikayət edirdilər. Hətta ABŞ-ın ən böyük onlayn satış platformalarından biri olan Amazon bu məhsul barədə istifadəçilərə xəbərdarlıq etməyə başlamışdı. Habelə, bu məhsul amazonda “Tez-tez qaytarılan məhsul” kateqoriyasına əlavə edilib. Artıq FineWoven aksesuar macərasına son qoyan şirkətin gələcəkdə daha dayanıqlı materiallardan istifadə edəcəyi gözlənilir. Hələlik isə bu materialın nə olacağı və onun nə zaman satışa çıxarılacağı məlum deyil.
