Bloomberg agentliyinin dərc etdiyi hesabat görə, Çinə ən çox çip istehsal edən avadanlıq tədarük edən ölkələr Yaponiya və Hollandiyadır. Maraqlısı budur ki, ABŞ bu vəziyyətdən heç razı deyil. Hətta ABŞ, Yaponiya və Hollandiyanı müxtəlif sanksiyalarla hədələməyə başlayıb.
![ABŞ sanksiyalarla](https://tedroid.com/media/2024/07/abs-yaponiya-hollandiya-sanksiyalarla-1.jpg)
Mənbənin verdiyi məlumata görə, ABŞ rəsmiləri Yaponiya və Hollandiyadakı həmkarları ilə görüş zamanı Çinə çip istehsal edən avadanlıqların tədarükü ilə bağlı da müzakirə aparıblar. Belə ki, ABŞ rəsmiləri yapon və holland tərəfdaşlarının Çin yarımkeçirici istehsalçılarına ixrac məhdudiyyətlərini tam sinxronlaşdırmaq istəməməsindən narazılıqlarını ifadə edirlər. Ümumiyyətlə, ABŞ və Çin arasında olan mübarizə hər kəsə məlumdur. ABŞ məşhur şirkətlərin Çin üçün müxtəlif avadanlıqlar və çip tədarükünü məhdudlaşdırıb. Bununla belə, Yapon və Holland şirkətlər Çin üçün avadanlıq tədarükünü davam etdirir.
İndi isə məlum olub ki, ABŞ Çinə avadanlıq ixrac edən üçüncü ölkələrə qarşı müxtəlif sanksiyalar tətbiq etməyə hazırlaşır. Xüsusilə, Çinə avadanlıq ixracında liderlik edən ASML və Tokyo Electron ABŞ tərəfindən sanksiyalara məruz qalmaqdan narahat olublar. Qeyd edək ki, bu vəziyyət sadəcə şirkətləri deyil, həmçinin Yaponiya və Hollandiya siyasətçilərini də narahat edir. Hələ rəsmi təsdiqini tapmayan bu şayiələr Yaponiyanın Tokyo Electron şirkətinin səhmlərinin qiymətinin Tokioda bugünkü birjada 8,3% ucuzlaşmasına səbəb olub.