Beləliklə, Cənubi Koreyada hidrogenlə işləyən 437 evdən ibarət Yuldong-With-U adlı ilk yaşayış kompleksi açılıb. Yaşayış kompleksindəki evlərin bütün istilik və elektrik enerjisinin 100%-i hidrogen yanacağı ilə qarşılanacaq. Ulsan şəhərində yerləşən yaşayış kompleksi ənənəvi enerji və istilik enerjisi mənbələrindən daha qənaətcildir.
Qeyd edək ki, iyun ayında yaşayış kompleksi ümumilikdə 840 MVt/saat enerji istehsal edib. Bu məbləğin ənənəvi elektrik mənbələri ilə ödənişi təxmini olaraq 108 min 286 dollar-dır. Hələlik, yaşayış kompleksində hidrogenlə istehsal olunan enerjinin qiyməti müəyyən edilmədiyi üçün pulsuz təklif olunur. Hidrogen isə yaşayış kompleksindən cəmi 200 metr məsafədə yerləşən Yuldong İstilik və Elektrik Stansiyası tərəfindən təmin edilir. Yaxınlıqdakı sənaye obyektlərindən hidrogeni 10 km-lik boru kəməri ilə qəbul edən elektrik stansiyası hidrogenlə istilik və enerji istehsal edərək ətraf mühitə vurulan zərəri azaldır.
Yaşayış kompleksinin damında yerləşdirilmiş üç konteyner həcmində olan yanacaq elementi 51 kq hidrogendən saatda 1,31 meqavat elektrik enerjisi istehsal edə bilir. Bu, dörd nəfərlik bir ev təsərrüfatının aylıq enerji istehlakını ödəməyə kifayət edir. Eyni zamanda, proses zamanı ayrılan istilik 40 ton tutumlu istilik akkumulyatorunda saxlanılıb. Saxlanılan istilik ilə isə su təxminən 70 dərəcəyə qədər qızdırılıb və evlərə paylanıb. Sadalanan üsul ilə təbii qaz və normal elektrik enerjisindən istifadə edən mənzillərlə müqayisədə enerji xərclərinin 30-40% azalacağı təxmin edilir.
