Teens in AI IWD’24 Azerbaijan, Azərbaycanda ilk dəfə, INNOLAND İnkubasiya və Akselerasiya Mərkəzi, Femtech və UNEC Startup İncubator-unun dəstəyi, həmçinin Tedroid-in media dəstəyi ilə keçirildi. 16-17 mart tarixlərində INNOLAND-da keçirilən hakaton Lamarr komandasının müsabiqəni uğurla başa vuraraq Azərbaycanı beynəlxalq mərhələdə təmsil etmək hüququ qazanması ilə yekunlaşdı.
Teens in AI tərəfindən 2015-ci ildən hər il keçirilən hakaton indiyə qədər 43 ölkədə 140-dan çox şəhərdə 12.000 dən çox gəncin iştirakı ilə keçirilərək, texnologiyada bərabərlik uğrunda mübarizə aparır və müsbət dəyişikliklər yaratmaq üçün yeni nəslə ilham verməyə çalışır. İlkin olaraq 150-dən çox müraciətdən seçim mərhələsinin sonunda yalnız 40 nəfəri 10 komanda olaraq lokal mərhələdə iştirak hüququ qazandı.
Hakatonun ilk günü Teens in AI haqqında təqdimatla başladı və qalan zamanda komandalar BMT-nin “Davamlı İnkişaf Məqsədləri”-nə uyğun olaraq real dünya problemlərini birgə həll etməyə çalışdılar. Həmçinin, hakatonun hər iki günü komandalar dizayn, süni intellekt və biznes sahəsi üzrə olan mentorların yüksək səviyyəli dəstəyi ilə öz layihələrini inkişaf etdirdilər. “Femtech”-in təsisçisi Nərgiz Əmrahova, “Bakı Dizayn Akademiyası”-nın təsisçisi Aysel Gülməmmədova, “UNEC Startup İncubator”-ın direktoru Mübariz Şahbazlı, “Sabah.hub İnkubasiya və Akselerasiya Mərkəzi”-nin məhsul sahibi İbrahim Süleymanov və “Azerconnect LLC”-in baş məhsul sahibi Kamil Muradzadə münsiflər heyətini təşkil etdilər.
Komandalar öz ideyaları üzərində işləyərək onları münsiflərə təqdim etdilər. Sonda “Lamarr”, “Tech Titans” və “Ersa Tech” komandaları müvafiq olaraq birinci, ikinci və üçüncü yerlərə layiq görüldülər. Maraqlı bir həftəsonundan sonra, lokal mərhələnin qalibi Lamarr komandası oldu. Onların layihəsi danışıq sözlərini eşitmə qabiliyyəti olmayan insanlar üçün vizual ekrana çevirən, müstəqil və maneəsiz ünsiyyəti təşviq edən real vaxt danışıq-mətn eynəklərini inkişaf etdirərək bu boşluğu aradan qaldırmağı hədəfləyir. Qalib kimi, Lamarr komandası “Teens in AI IWD’24 Global Day”-də Azərbaycanı təmsil edəcək.
