Ötən aylarda 700 min dollar investisiya alan Recepta startapı Visa İnnovasiya Proqramına seçilib. Qeyd edək ki, Recepta Visa İnnovasiya Proqramına seçilən ilk Azərabycan startapıdır. Daha əvvəl isə startap Bakıda keçirilən Teknofest TakeOFF Bakı sammitinin qalibi seçilmişdi. Recepta startapının əsas mahiyyəti rəqəmsal qəbzlərdən ibarətdir. Belə ki, ətraf mühitin qorunması üçün nəzərdə tutulan bu addım beynəlxalq arenada da bir çox şirkətlə razılıq əldə edə bilib.
Recepta startapının ideyasına görə rəqəmsal qəbzlər ABŞ-da hər il 12 milyon ağacın, 21 milyard qallon (1 qallon- 3.7 litr) suyun, 250 milyon qallon neftin və 3 milyard dollar vəsaitin sərf olunmasının qarşısını alacaq. Belə ki, rəqəmsal qəbzlər bütün dünyada ən çox kağız istifadə olunan adi qəbzlərin yerini dolduracaq. Bununla da həm ətraf mühiti qorumaq həm də büdcəyə qənaət etmək mümkündür. Recepta startapı ölkəmizdə artıq bir neçə bank və dövlət orqanları ilə danışıqlar aparır. Visa innovasiya Proqramına seçilmək yerli starapımız üçün böyük fürsətdir. Belə ki, Recepta proqramda Visa və Hackquaters-ın expertləri ilə birgə yeni həllər üzərində çalışa və bu sahədə ən son texnologiyalardan yararlanmaq üçün fürsət əldə edə bilər.
Recepta startapı ideyasını reallaşdırmaq üçün Recepta tətbiqi üzərində çalışır. Recepta tətbiqi hər bir alışda bütün kart əməliyyatları üçün rəqəmsal qəbzlərin yaradılması və yığılmasını avtomatlaşdıran, kağız qəbzlərə ehtiyacı aradan qaldıran rəqəmsal qəbz idarəetmə tətbiqidir. Startapın icraçı direktoru Fuad Heydərli bildirib ki, Recepta Visa innovasiya Proqramı çərçivısində ilkin olaraq Türkiyə bazarına çıxmağı hədəfləyir.
Startap ekosistemi xəbərlərini "İnnovasiya və Rəqəmsal İnkişaf Agentliyi" ilə tərəfdaşlıq çərçivəsində oxuyursunuz.
