Azərbaycanın ilk vençur kapitalı fondu “Caucasus Ventures” ötən ilin sonunda yaradılıb. Rəqəmsal İnkişaf və Nəqliyyat Nazirliyinin strukturunun yenidən qurulması və rəqəmsal inkişaf yolunda müxtəlif layihələrə dəstək verməsi səbəbindən bu fondun yaradılması qaçılmaz olub. Startap ekosisteminin əsas təsisçilərindən və oyunçularından biri olan Məmməd Kərimin təsis etdiyi fond ölkəmiz üçün çox uğurlu biznesdir. Caucasus Ventures-in kapitalı 11,3 milyon manatdır. Fonda Rəqəmsal İnkişaf və Nəqliyyat Nazirliyi 5 milyon manat, “PAŞA Holdinq” Şirkətlər Qrupu 5 milyon manat, fərdi sahibkarlar isə 1,3 milyon manat investisiya yatırıb. Fondun əsas məqsədi həm Azərbaycanda, həm də regionda startaplara investisiya qoymaqdır.
Caucasus Ventures-in əsas diqqəti Qafqaz, Türkiyə, Şərqi Avropa və Mərkəzi Asiyadır. Fond əsasən bu regionlarda Saas, Fintech və digər startaplara sərmayə qoymağı hədəfləyir. Caucasus Ventures iki mərhələdə startaplara sərmayə qoyur. Birinci mərhələdə investisiyanın həcmi 50 min dollara qədər, ikinci mərhələdə isə 200 min dollara qədərdir. Fond artıq 3 startapa investisiya yatırıb: Turan APP, Tested Web və Magic Port.
Turan APP türk dünyası ölkələri arasında komissiyasız pul köçürmə xidməti təqdim edir. İstanbulda qurulan startap Azərbaycanda ilk dəfə Türkiyədən kənarda fəaliyyətə başlayıb. Startapın təsisçisi Özgür Bayraktardır.
TestedWeb saxta rəyləri yoxlamaq və silmək üçün süni intellektdən istifadə edən 2 qazanclı onlayn araşdırma platformasıdır. Startapın təsisçisi ABŞ-da yaşayan Azərbaycanlı Yaqub Rəhimovdur.
Magic Port gəmi sahibləri, menecerlər və gəmi personalı üçün etibarlı əməkdaşlıq etmək üçün müxtəlif alətlər təqdim edir. Startapın əsas fəaliyyət mərkəzi Sinqapurdur. Magic Port-un təsisçisi isə Azərbaycanlı Əli Qaradır .
İnvestisiya alan startaplardan ikisinin təsisçisi azərbaycanlıdır. Seçilmiş startaplardan da görünür ki, “Caucasus Ventures” şirkətinin saytında qeyd olunan seçim meyarlarından əlavə, startapların təsisçilərinin azərbaycanlı olması və ya startapın Azərbaycana fayda verməsi əsas meyarlardandır. Bu olduqca yaxşı meyardır.
Caucasus Ventures şirkətinin verdiyi məlumata görə, onlar Azərbaycan, Türkiyə, Qazaxıstan və Özbəkistandan olan 70-dən çox startap təsisçisi ilə görüşüblər. Onlar bu startaplardan yalnız 3-nə sərmayə qoya biliblər. Görüşlər hələ də davam edir. Hazırkı kapitalla fondun yaxın 5-7 il ərzində investisiya imkanlarının olacağı proqnozlaşdırılır.
Fonda müraciət internet saytı vasitəsilə onlayn həyata keçirilir. Startaplar investisiya üçün birbaşa caucasus.vc saytından müraciət edə bilərlər.
