“Miniboss Business School Baku”nun tələbələri Qlazqoda keçirilən Startaplar üzrə Dünya Çempionatında 20-dən çox ölkənin komandası arasında birinci olaraq qalib elan edilib.
“Miniboss Business School Baku”nun tələbələri 16-20 iyul tarixlərində Şotlandiyanın Qlazqo şəhərində 6-16 yaş arası uşaqlar və yeniyetmələr arasında keçirilən Startaplar üzrə Dünya Çempionatının qalibi olub.
20-dən çox ölkənin iştirak etdiyi tədbirdə ən yüksək nəticə göstərərək finala çıxan “Econotes” komandası innovativlik, mənfəətlilik, layihənin əhatə dairəsi, mediada işıqlandırma, münsiflər heyətinin suallarını cavablandırma meyarları üzrə digər komandaları geridə qoyaraq birinci olub. Beləliklə Azərbaycan komandası olan Econotes dünya çempionatında qalib olub. Qeyd edək ki, “Econotes” komandası cari ildə “Miniboss Business School Baku”nun təşkilatçılığı, Kiçik və Orta Biznesin İnkişafı Agentliyinin (KOBİA) dəstəyi ilə keçirilmiş Milli Startap Çempionatının da qalibidir. Startapın ideyası baş tərəfində toxum olan qələmlərdir. Sadəcə, baş tərəfinə içində toxum olan kapsullara yapışdırılmış qələm bitdikdən sonra onu cücərməsi üçün dibçəyə əkmək lazımdır. Layihə eyni zamanda “ekoloji” ekosistemdə də Azərbaycanı təmsil etməsilə fərqlənir.
Dörd günlük proqram çərçivəsində keçirilən “Ölkə günü” tədbirində tələbələrimiz milli geyimlərdə ölkəmizdən gətirilən şirniyyat, suvenir və digər atributlarla Azərbaycanı xüsusi olaraq təmsil ediblər. Tədbir çərçivəsində Rəna Adıgözəlova milli rəqs proqramı, Dilşad Fərhadzadə isə skripka ifası ilə çıxış edib. Növbəti gün isə “Miniboss Baku biznes məktəbi”nin tələbələri 9 startap layihəsi ilə seçmə turunda iştirak edərək beynəlxalq münsiflər heyətinin suallarını cavablandırıblar. Qeyd edilib ki, müxtəlif ölkələrdən təmsil olunan münsiflər heyəti tərəfindən biznes layihələr beş kateqoriya üzrə dəyərləndirilib.
Startaplar üzrə Dünya Çempionatında təqdim olunan biznes layihələr müxtəlif sahələri təmsil edən beynəlxalq ekspertlər və sahibkarlar tərəfindən dəyərləndirilib. Eləcə də, Azərbaycandan münsiflər heyətində KOBİA-nın İdarə Heyəti sədrinin müavini Rüfət Atakişiyev və “İteca Caspian” şirkətinin rəhbəri Fərid Məmmədov yer alıblar. Seçmə turundan sonra müxtəlif sahələrdə təmsil olunan “Challenger”, “Econotes”, “WoodMood”, “BeSafe”, “VIP Puzzle”, “Scenty sport”, “Box from my land”, “Screenish”, “Yummy Gummy” adlı biznes layihələrinin yarmarkası təşkil olunub.
Startaplar üzrə Dünya Çempionatı çərçivəsində “Eurowoman: Global Leadership Forum 2023” adlı tədbirdə “Miniboss Business School Baku”-nun təsisçisi Nərminə Həsənova “Gələcəyin güvənli sahibkarların yetişdirilməsi” mövzusu ilə çıxış edib.
