MIT tədqiqatçıları hüceyrə ölçülü robotları gücləndirə biləcək saç teli nazikliyində kiçik bir batareya hazırlayıblar. Tədqiqatçılar bu nazik batareyaların tibbdə inqilab edə biləcəyini düşünür. Belə ki, bu yeni texnologiya insan orqanizminə dərman çatdıran robotlar və ya qaz kəmərlərində sızıntıları aşkar edən cihazlar kimi bir çox sahədə inqilab edə bilər.
Massachusetts Texnologiya İnstitutunun (MIT) mühəndisləri kiçik və avtonom robotların enerji ehtiyaclarını ödəmək üçün kifayət qədər effektiv olan hüceyrə ölçüsündə batareya dizayn ediblər. Mühəndislər tərəfindən hazırlanmış bu “sink-hava batareyası” qum dənəsindən kiçikdir və cəmi 0,1 millimetr uzunluğunda və 0,002 millimetr qalınlığındadır ki, bu da insan saçının qalınlığına bərabərdir. Bu kiçik batareya havadan oksigeni alır və 1 volt potensiala malik cərəyan yaradaraq sinki oksidləşdirir. Bildirilir ki, bu enerji miqdarı kiçik dövrə, sensor və ya aktuatorun işləməsi üçün kifayətdir.
MIT Kimya Mühəndisliyi Departamentinin müəllimi Michael Strano bu yeniliyin robototexnika sahəsində mühüm dönüş nöqtəsi olacağını bildirir. Strano laboratoriyası illərdir ətraf mühitin stimullarına cavab verə bilən kiçik robotlar üzərində işləyir. Bununla belə, bu cür robotların yaradılmasında ən böyük problem kifayət qədər enerji mənbələrinin təmin edilməsi idi. Digər tədqiqatçılar günəş enerjisi ilə işləyən mikroskopik cihazlar hazırlasa da, bu cihazların daimi lazer və ya işıq mənbəyinə qoşulu olması tələb olunurdu.
Strano daha avtonom robotlar hazırlamaq üçün laboratoriyasında sink-hava batareyalarından istifadə etməyi seçib. Sink-hava batareyaları yüksək enerji sıxlığı sayəsində uzun ömrü ilə tanınır və tez-tez eşitmə cihazlarında istifadə olunur. Komandanın hazırladığı batareya mikroelektronika üçün geniş istifadə olunan SU-8 adlı polimer zolağına daxil edilmiş platin elektroda qoşulmuş sink elektroddan ibarətdir. Bu elektrodlar havadakı oksigen molekulları ilə qarşılıqlı əlaqədə olduqda, sink oksidləşir və platin elektroda axan elektronları buraxaraq cərəyan yaradır.
