Tədqiqatçılar fizika, kimya, mühəndislik və digər sahələrdə kəşflərə səbəb olacağı güman edilən dünyanın ən sürətli mikroskopunu hazırlayıblar. Beləliklə, Arizona Universitetinin alimləri dünyanın ən sürətli elektron mikroskopunu hazırlayaraq elm dünyasında böyük addım atıblar.
Bu yeni mikroskop, bir saniyədə dünyanın ətrafında birdən çox dövrə bura biləcək qədər sürətli hərəkət edən elektronları dondurulmuş çərçivələr halında görüntüləyə bilir. Bu kəşf fizika, kimya, biomühəndislik və material elmləri kimi bir çox sahədə inqilabi yeniliklər təmin edə bilər. Qeyd edək ki, elektronlar adətən göz tərəfindən görülə bilməyəcək qədər kiçik və sürətli hissəciklərdir. Elektronun hərəkətini görə bilmək, saatda 350 km sürətlə keçən avtomobilin fotosunu çəkməyə çalışmaq kimidir. Arizona Universitetinin tədqiqatçıları bu elektronların hərəkətini aydın şəkildə çəkə bilən mikroskop hazırlamağa nail olublar.
Bu yeni mikroskop çox güclü kamera kimi işləyir. Bildiyiniz kimi, hər bir yeni smartfon modeli daha yaxşı kamera ilə gəlir. Bu kameralar fotoşəkilləri daha aydın və detallı edir. Eyni şəkildə, bu mikroskop elm adamlarına əvvəllər görmədikləri şeyləri, yəni elektronları görmək imkanı verir. Mikroskopun bu xüsusiyyəti elm adamlarına elektronların necə hərəkət etdiyini və bu hərəkətlərin arxasındakı kvant fizikasını anlamağa kömək etmək məqsədi daşıyır. Bu mikroskopu hazırlayarkən tədqiqatı aparan qrup Nobel mükafatı laureatları Pierre Agostini, Ferenc Krausz və Anne L’Huillierin işlərindən ilhamlanıb. Bu üç alim 2023-cü ildə attosaniyə müddəti yəni saniyənin kvintilyonda biri müddətində olan işıq impulsları istehsal edərək bu sahədə əsaslı kəşf etmişdi.
