Alimlər plastik çirklənməyə qarşı yeni həll yolu hazırlayıblar. Belə ki, canlı plastik adlanan bu maddə ətraf mühitə zərər vermədən özünü məhv edə bilir, bununla da tullantılar üçün yeni bir bioloji həll yoluna imkan verir.
Ümumiyyətlə, son zamanlar plastik çirklənmə dünyamızın ən böyük problemlərindən birinə çevrilib. Plastik tullantılar okeanlardan tutmuş torpağa qədər hər yerə yayılaraq həm ekosistemləri təhdid edir, həm də insan sağlamlığını riskə atır. Bununla belə, elm adamları bu problemə yeni bir həll yolu tapmış ola bilərlər. Tədqiqatçıların canlı plastik adlandırdıqları bu yeni materialda xüsusi olaraq yetişdirilmiş bakteriyalar var. Bu bakteriyalar müəyyən şərtlər altında aktivləşən və plastiki parçalayan xüsusi fermentlər istehsal edir. Necə ki, bir toxum yerə düşüb bitkiyə çevrilir, bu bakteriyalar da plastik içində yatır və uyğun mühit tapdıqda oyanırlar.
Bu araşdırmanın bir hissəsi olaraq, Çin Elmlər Akademiyasının alimləri lipaz BC kimi tanınan plastik parçalayan fermenti ifraz etmək üçün genetik olaraq hazırlanmış Bacillus subtilis bakteriyasının ştammını yaradıblar. Bu bakteriyalar daha sonra ağır metal ionlarına məruz qalaraq spora çevrilir. Qeyd edək ki, Spor ətraf mühitin əlverişsiz şəraitində bakteriya hüceyrəsində irsi informasiyanın saxlanılmasını təmin edən sükunət formasıdır. Daha sonra tədqiqatçılar bu sporları plastik materiala əlavə edir və bu sporlar plastik müəyyən bir müddət ərzində müəyyən bir tətikçiyə məruz qaldıqda aktivləşir. Sporlardan çıxan bakteriyalar plastik molekulları parçalayaraq tamamilə təbii maddələrə çevrilib.
