Qazaxıstanın paytaxtı Astana şəhərində “Google” şirkəti və “Strategeast” Mərkəzi tərəfindən “Dayanıqlı inkişaf üçün süni zəka ilə yarat” (Build with Al for Sustainable Growth) proqramının bağlanış mərasimi və final hakaton yarışması keçirilib. Hakatonda Mərkəzi Asiya və Qafqaz regionundan ümumilikdə 120-dən çox startap iştirak edib. Azərbaycanı təmsil edən 5 startapdan biri “Farm Forward” hakaton müsabiqəsinin qalibləri sırasına daxil olaraq 3-cü yerə yüksəlib. Bu startap süni zəkanın tətbiqi ilə torpaqda bəzi dəyərləri analiz edərək torpağa lazım olan gübrələri təyin edən model hazırlayıb.
Hakatona Azərbaycandan, həmçinin “Sundhordvik”, “Beledchi”, “sustAIn” və “Ecomart” startapları da qatılıblar. Startaplar müvafiq olaraq içməli su çatışmazlığı probleminin innovativ həlli (“Sundhordvik”) , ağacların optimal əkilməsi üçün peyk görüntüləmə sistemi (“Beledchi”), kənd təsərrüfatında su israfının idarə edilməsi (“sustAIn”) və istehsalçılar üçün tələbi dəqiq proqnozlaşdıran, tez xarab olan malların itkisinin qarşısını alan süni intellekt əsaslı idarəetmə proqramını (“Ecomart”) yaradıblar.
Bu startap komandaları ilə 22 oktyabr tarixində ölkədə startap ekosisteminin inkişafını təşviq edən İnnovasiya və Rəqəmsal İnkişaf Agentliyində (İRİA) görüş keçirilib. İRİA-nın sədri İnarə Vəliyeva onların fəaliyyəti və gələcək planları ilə tanış olub. Startap nümayəndələri yerli ekosistemdə məhsuldar fəaliyyət üçün yaradılmış imkanlar, habelə hakatonun təcrübə mübadiləsi və regional startaplarla şəbəkələşmə baxımından əhəmiyyətini vurğulayıblar. İ.Vəliyeva startapların hər birinin gördüyü işlərlə yerli ekosistemə dəyər qatdıqlarını xüsusilə diqqətə çatdırıb və onlara gələcək fəaliyyətlərində uğurlar arzu edib.
Qeyd edək ki, cari ilin mart ayından başlayan proqram ərzində Mərkəzi Asiya və Qafqaz regionundan 900-dən çox süni zəka eksperti və startaplar ətraf mühit və dayanıqlıq problemlərinin “Google” şirkətinin süni zəka modeli “Gemini” vasitəsilə həlli istiqamətində bir sıra seminarlarda iştirak ediblər. 18 oktyabr tarixində keçirilən hakatonda startaplar final layihələrini təqdim ediblər.
