Yəqin ki, bir körpünün uçmaq üzrə olduğu ehtimalı 20 faiz olsaydı, heç kim o körpüdən keçməyə cürət etməzdi. Habelə, Təyyarənin 20 faiz qəza ehtimalının olduğunu bilsəydik, heç kim o təyyarəyə minməzdi. Ancaq süni intellekt kimi inqilabi texnologiyanı ona etibarımız və gözləntilərimizlə sürətlə irəlilədikcə, eyni 20 faizi göz ardı edirik. Lakin bu dəfə xəbərdarlıq süni intellektin yaradıcılarından biri tərəfindən edilir: Geoffrey Hinton. Belə ki, onun CBS telekanalına müsahibəsində verdiyi açıqlaması hər kəs tərəfindən təəccüblə qarşılanıb. Müasir süni intellektin memarlarından biri olan və “Süni intellektin atası” kimi tanınan Nobel mükafatı laureatı Hinton bildirib ki, süni intellektin dünyanı ələ keçirmək ehtimalı 20%-dir.
Süni intellektin inkişafını təhlükəli bir bənzətmə ilə izah edən Hinton deyir: “Bunu emosional olaraq başa düşməyin ən yaxşı yolu, həqiqətən sevimli pələng balasına sahib olmaq kimidir. Əgər böyüyəndə səni öldürmək istəmədiyinə əmin ola bilmirsənsə, narahat olmalısan”. Hintonun ideyaları və işi ChatGPT kimi geniş miqyaslı modelləri mümkün edən texniki əsasları qoyub. 2023-cü ildə Google-dakı vəzifəsindən ayrılan Hinton bu qərarı açıq danışa bilmək üçün verdiyini bildirib. Son beş ildə süni intellektin inkişaf etdiyini vurğulayan Hinton, sürətlə inkişaf edən texnologiyanın harada inkişaf edəcəyini təxmin etməyin çətin olduğunu, lakin potensial olaraq qorxulu olduğunu bildirib. Hinton həmçinin bildirib ki, böyük texnologiya şirkətləri artıq demək olar ki, mövcud olmayan süni intellekt qaydalarını yumşaltmağa çalışırlar və təhlükəsizlik tədbirlərinə məhəl qoymurlar.
Mövcud hüquqi tənzimləmələrin qeyri-kafiliyinə diqqət çəkən alim şirkətlərin daha çox bazar payı və sürət naminə təhlükəsizlik məsələlərinə güzəştə getdiyini bildirib. Hintonun sözlərinə görə, bu şirkətlər hesablama güclərinin yalnız kiçik bir hissəsini təhlükəsizlik araşdırmalarına həsr edirlər. Hintonu narahat edən başqa bir məqam süni intellektdən hərbi sahələrdə istifadədir. Xüsusilə Google-u tənqid edən Hinton, şirkətin süni intellekti silahlandırmayacağına dair əvvəlki vədindən döndüyünü və 2025-ci ilin əvvəlində texnologiyasının hərbi istifadəsinə yaşıl işıq yandıraraq siyasətini dəyişdiyini xatırladıb. Hinton, “pis olma” şüarını tərk edən şirkətin bu addımından məyus görünür. Təbii ki, bu tənqidlərə baxmayaraq, süni zəkanın atası kimi qələmə verilən Hinton süni intellektin əleyhdarı deyil. Əksər elm adamları və uzaqgörənlər kimi o da hesab edir ki, texnologiya təhsili, təbabəti, elmi dəyişdirə və iqlim dəyişikliyini potensial olaraq həll edə bilər
