Avropa Birliyinin ali icra orqanı olan Avropa Komissiyası məlumatların məxfiliyinə dair öz ciddi qanunlarını pozduğuna görə 400 avro təzminat ödəməyə məcbur edilib. Bu qərarı Avropa İttifaqının Baş Məhkəməsi verib və beləliklə, Avropa Birliyi özünü ilk dəfə cərimələməklə tarixə düşüb.
Məhkəmənin məlumatına görə, insident Almaniya vətəndaşının Avropa Komissiyasının təşkil etdiyi konfransda iştirak etmək üçün “Facebook ilə daxil ol” seçimindən istifadə etməsi ilə başlayıb. Lakin bu proses zamanı iştirakçının İP ünvanı, brauzer məlumatları və cihaz məlumatları ABŞ-dakı şirkətlərə – konfransın vebsaytına ev sahibliyi edən Amazon və Facebook-un sahibi olan Meta-ya lazımi tədbirlər görülmədən ötürülüb. Bunun, Ümumi Məlumatların Qorunması Qaydası (GDPR) çərçivəsində Avropa Birliyinin ciddi məxfilik qaydalarına zidd olduğu müəyyən edilib. Alman vətəndaşının qaldırdığı işi araşdıran məhkəmə Komissiyanın məlumatların təhlükəsizliyini təmin etmək üçün kifayət qədər tədbirlər görmədiyini və bunun “ciddi pozuntu” olduğunu bildirib.
Reuters-in məlumatına görə, Avropa Komissiyası ilk dəfədir ki, öz şəxsi məlumatların məxfiliyi qanunlarını pozduğuna görə cərimələnib. Bu vəziyyət həm də Aİ-nin GDPR qaydalarına uyğunluq həssaslığını və fərdlərin hüquqlarını qorumaqda nə qədər irəli gedə biləcəyini bir daha sübut edib. Avropa İttifaqı tərəfindən 2018-ci ildə qüvvəyə minən Ümumi Məlumatların Qorunması Qaydası (GDPR) dünyada məlumatların məxfiliyinə dair ən sərt qaydalardan biri hesab olunur. Qaydalar şəxslərin şəxsi məlumatlarının emalı zamanı maksimum şəffaflığı və təhlükəsizliyi təmin etmək məqsədi daşıyır. Belə ki, GDPR-ni pozan təşkilatlar illik dövriyyəsinin 4%-i qədər cərimələnə bilər.
