Son illərdə xüsusilə son 10 ildə avtomobil oğurluğu halları artıb. Belə ki, avtomobil istehsalçılarının səhlənkarlığı səbəbindən açarsız girişə sahib olan avtomobillər kütləvi halda oğurlanır. Maraqlısı budur ki, bu avtomobilləri oğurlamaq üçün oğruların sadəcə internetdən əldə edə biləcəyi bir cihaza sahib olması kifayətdir. Heç bir texniki biliyi olmayan oğrular belə açarsız giriş sistemlərindəki zəifliklərdən istifadə etməyə imkan verən sadə qurğu ilə oğurluq edə bilirlər. Avtomobil sahibləri isə bunu istehsalçıların səhlənkarlığı adlandırır.
Ümumiyyətlə, İnternetdə sərbəst olaraq satılan cihazları istifadə edərək, proqramlaşdırma və ya kompüter biliyi olmayan insanlar belə artıq 20 saniyəyə bir avtomobilə daxil ola bilir və onu istifadə edə bilir. Çox vaxt əl oyun konsolu kimi maskalanan bu cihazlar emulator olaraq tanınır. Bu qurğular avtomobildən yayılan siqnalı aşkar edir, onun həqiqi açar olub-olmadığını yoxlayır və sonra avtomobilə daxil olmaq üçün siqnalı geri ötürür. Böyük Britaniyadkı bir çox Hyundai sahibləri artıq nisəbətən münasib qiymətli avtomobillərinə görə bu cihazın qurbanı olublar. Qeyd edək ki, söhbət koreyalı avtomobil istehsalçısının köhnə modellərindən deyil, tamamilə yeni Ioniq 5 modelindən gedir.
Bir çox Koreyalı elektrik avtomobil sahibləri indi oğruların qarşısını almaq üçün sükan kilidlərindən istifadə edirlər. The Observer-in araşdırması nəticəsində məlum olub ki, Toyota, Lexus və Kia kimi markaların digər modelləri də eyni problemin qurbanı olub. Maraqlısı budur ki, avtomobil istehsalçıları bu potensial zəiflik haqqında on ildən çoxdur ki, bilirlər. Kaliforniya Universiteti və Vaşinqton Universitetinin 2011-ci ildə hazırladığı hesabat, avtomobil sahibi yaxınlaşdıqda avtomobilin kilidini açan və bir düyməyə basaraq mühərrikini işə salan ağıllı açarların oğrulara yeni imkanlar açacağını təsdiq etmişdi. Bununla belə, o zaman bəzi avtomobil istehsalçıları avtomobil oğrularının bu zəifliklərdən istifadə etmək üçün kifayət qədər biliyə sahib olmadığına inanırdı.
İndi isə vəziyyət ortadadır. İngiltərə və Uelsdə avtomobil oğurluğu halları 2014-cü ildə təxminən 70.000-dən 2023-cü ildə təxminən 130.000-ə yüksəlib. ABŞ-da isə son illərdə avtomobil oğurluğu 25% artıb. Böyük Britaniyadan olan hüquqşünas Nick Freeman bildirir ki, Bu avtomobillərin təhlükəli və sürülməz olduğuna dair güclü hüquqi arqument var. Çünki avtomobil istehsalçıları sözün əsl mənasında səhlənkar davranıb, təhlükəsizliyə önəm vermədiyi üçün sürücülər bunun əziyyətini çəkir.
