Mesajlaşmaq günlük həyatda ən çox istifadə etdiyimiz əlaqə vasitələrindən biridir. Hətta bir çoxumuz zənglə danışmaq yerinə mesajlaşmağı seçə bilirik. Şəxsi və ya iş həyatında olan önəmli məsələləri də mesajlaşaraq müzakirə etdiyimiz üçün bəzən bu mesajları sildikdən sonra yenidən geri qaytarmaq istəyirik. Ən çox vaxt keçirdiyimiz sosial şəbəkələrdən olan Instagram platformasında da silinən mesajları geri gətirmək mümkündür? Bu sualın cavabı “bəli”-dir. Elə isə addım-addım İnstagram-da silinən mesajları necə geri gətirə biləcəyimizə baxaq.
1. Instagram-ı web brauzerdə açın
İnstagram da silinən mesajları geri qaytarmaq istəyirsinizsə bunun üçün etməli olduğunuz bir neçə addım var. Bunlarda birincisi İnstagram tətbiqini masaüstü veb-brauzerdə açmaqdır. Yəni bu proses mobil internet brauzeriniz və ya mobil tətbiq ilə həyata keçirilmir.
2. Instagram hesabınıza daxil olun
İkinci etməli olduğunuz addım mesajlarınızı geri qaytarmaq istədiyiniz hesabınızın giriş məlumatlarını (istifadəçi adı, şifrə) daxil etməkdir. Əgər iki faktorlu autentifikasiyadan (two-factor authentication) istifadə edirsinizsə, giriş məlumatlarını daxil etdikdən sonra hesabınızı əlaqələndirdiyiniz mobil nömrənizə gələn sms-i daxil edin.
3. Profil şəklinizə klikləyin
Giriş məlumatlarınızı daxil etdikdən və ehtiyac olarsa mobil nömrənizə göndərilən sms-i daxil etdikdən sonra hesabınız açılacaq. Bundan sonra açılan səhifənin yuxarı sağ hissəsində 6 ədəd fərqli seçimlər etməyinizə kömək edən düymələr görəcəksiniz. Burada ən sağda dayanan profil şəklinizin üzərinə klikləyin.
4.Profili seçin
Profil şəklinizin üzərinə kliklədikdən sonra açılan menyuda profil (Profile), saxlanılanlar (Saved), tənzimləmələr (Settings) və çıxış etmək (Log out) seçimləri görünəcək. Bu seçimlər arasından profil seçiminə klikləyin.
5. Profili redaktə et bölməsini seçin
Instagram da silinən mesajları geri qaytarmaq üçün etməli olduğunuz növbəti addım menyudan profili seçdikdən sonra qarşınızda açılan hissədə istifadəçi adınızın sağında profili redaktə et (edit profile) yazısına klik etməkdir.
6. Gizlilik və güvənlik
Qarşınızda açılan pəncərənin sol sütununda sizə bir sıra seçimlər veriləcək. Bunların arasından Gizlilik və güvənlik (Privacy and Security) yazılan hissəni seçin.
7. Data yükləmə
Gizlilik və güvənlik seçdiyiniz zaman hesabınızın gizliliyi və güvənliyi üçün bir çox seçimlər ilə qarşılaşacaqsınız. Bunları yuxarı sürüşdürərək Data yükləmə (Data Download) bölməsini tapın.
8. Yükləmə tələb et
Data yükləmə yazısını tapdıqdan sonra onun aşağı hissəsində yükləmə tələb et (Request Download) əmrinə klik edərək slinən mesajları geri qaytarma prosesini davam etdirin.
9. Seçiminizi edib e-mail adresinizi daxil edin
Qarşınıza çıxan səhifədə redaktə etməli olduğunuz bir neçə seçim var. Daha sonra isə məlumatınız Instagram hesabınızda qeydiyyatdan keçmiş e-mail ünvanına göndərilir, lakin siz bunu dəyişə bilərsiniz. Eynilə, məlumatınız standart olaraq HTML formatında göndərilir, lakin siz onu JSON formatına dəyişə bilərsiniz. Düzəlişləri etdikdən sonra prosesi davam etdirmək üçün səhifənin altındakı İrəli (Next)düyməsini sıxın.
10. Prosesi təsdiqləyin
Bir çox sosial media platformalarında olduğu kimi, Instagram-da belə bir məlumat paylaşma tələbi olduqda, göndəriləcək məlumatların hamısı şəxsi məlumatlardan ibarət olduğu üçün istifadəçidən şifrə daxil etməsi tələb olunur. Instagram hesabınızın şifrəsini daxil etməklə bunu təsdiqləyin.
11. Mail adresinizə gələn linkdən məlumatlarınızı yükləyin
Təəssüf ki, məlumatlarınızı tələb edən kimi Instagram bunu sizə göndərmir. Bu bəzən mümkündür, lakin bu proses adətən 14 gün ərzində tamamlanır və e-mail ünvanınıza keçid göndərilir. Bu keçidi açdığınız zaman sizdən parolu yenidən daxil etməyiniz tələb oluna bilər. İnstagramda saxladığınız bütün məlumatların olduğu qovluğu, məlumatlarınızı endirə biləcəyinizi bildirən səhifənin altındakı yükləmə düyməsi ilə yükləyə bilərsiniz.
12. Instagram da silinən mesajlar sizi gözləyir
Instagram tərəfindən sizə göndərilən link vasitəsilə endirdiyiniz qovluqda məlumatlarınızın yer aldığı çoxlu fayllar olacaq. Instagram da silinən mesajları bərpa etmək üçün son addım olaraq Mesajlar faylını burada tapın. Bu sonuncu addımıda yerinə yetirdikdən sonra silinmiş mesajlarınıza qovuşmuş olacaqsınız.
Qeyd: Sosial media platformalarındakı məlumatlarınız dərhal silinmədiyi üçün onu silsəniz belə, platformanın serverlərində saxlanıla bilər. Əgər sildiyiniz mesajların ehtiyat nüsxəsi çıxarılmayıbsa, onları asanlıqla bərpa etmək mümkün deyil. Bu səbəbdən də bu yolla bütün mesajlarınızı geri qaytaracağınızın qarantisi yoxdur.
