Son dövrlərdə dünyada geniş vüsət alan süni intellekt texnologiyaları artıq təkrar olur. Belə ki, insanlar bir-birinə bənzər minlərlə eyni funksiyaya sahib süni intellekt hazırlamağa başlayır. Hindistan hökuməti isə indi icazəsiz süni intellekt modellərinin hazırlanmasını qadağan edir. Belə ki, hökumət süni intellekt modellərinin tətbiqi üçün yeni tənzimləmə tətbiq edib. Artıq şirkətlər süni intellekt modellərini dərc etməzdən əvvəl hökumətdən icazə əldə etməlidirlər.
Ümumiyyətlə, Hindistan süni intellekt ilə bağlı qlobal müzakirələrdə getdikcə daha fəal rol oynayır. Cənubi Asiya ölkəsi bu yaxınlarda bəyanat verərək, böyük texnologiya şirkətlərinə yeni süni intellekt modellərini təqdim etməzdən əvvəl hökumətdən icazə almaları barədə xəbərdarlıq edib. Hətta Hindistanın Elektronika və İnformasiya Texnologiyaları nazirliyi cümə günü şirkətlərə bununla bağlı xəbərdarlıq edib. Müvafiq olaraq, şirkətlərdən xidmət və ya məhsullarının “heç bir qərəz və ya ayrı-seçkiliyə yol verməməsini və seçim prosesinin bütövlüyünü təhdid etməməsini” təmin etmələri xahiş olunub.
Nazirlik tövsiyənin hüquqi cəhətdən məcburi olmadığını etiraf etsə də, nazir müavini Rajeev Chandrasekhar xəbərdarlığın gələcək qaydalara işarə etdiyini bildirir. O bildirib ki, “Biz bunu bu gün tövsiyə olaraq veririk və sizləri buna əməl etməyə çağırırıq”. Nazirlik texnologiya şirkətlərindən 15 gün ərzində “Görülən tədbirlər və vəziyyət hesabatı” təqdim etmələrini də xahiş edib. Bu hesabatda şirkətlər dezinformasiya ilə mübarizə üçün hansı addımları atdıqlarını izah etməli, həmçinin xidmətlərinin qərəzsiz və obyektiv olduğunu göstərməlidirlər.
