Texnologiya inkişaf etdikcə təhlükəsizliklə bağlı çətinliklər davamlı olaraq artır. Pislik etmək istəyən insanlar da heç vaxt öz əməllərindən geri qalmırlar. 2 il əvvəl ortaya çıxmış Tesla Model S elektromobilinin oğurlanması videosunu bəlkə də bəziləriniz xatırlayır. Həmin cinayəti törədən şəxslər RSA rele üsulundan istifadə etmişdilər. Şəxslərdən biri avtomobilin yanında hazır vəziyyətdə gözləyir, digəri isə açardan gələn siqnalları təyin edir. Proses tamamlandıqda açardan əldə edilən siqnallar avtomobilin yanındakı adama ötürülür. Beləcə oğurluq baş tutur. İndi də bənzər şəkildə bluetooth siqnalları vasitəsilə avtomobil oğurluğu mövzusu təkrar gündəmə gəlib.
Avtomobil oğurluğunda bluetooth siqnalları necə istifadə olunur?
NCC Group kiber təhlükəsizlik firmasının baş təhlükəsizlik məsləhətçisi Sultan Qasim Khan, bu barədə araşdırma aparıb. Avtomobil oğurluğunda bluetooth siqnallarının nə dərəcədə effektiv olduğu yoxlanılıb. Yenə Tesla markalı avtomobil hədəf seçilib. Belə ki, Khan Tesla Model Y modeli üçün açar funksiyası yerinə yetirən smartfonu mətbəxdə stolun üstünə qoyur. Daha sonra fərqli otağa keçərək kompüterindən BLE bluetooth modulunu aktivləşdirir. Bluetooth modulu həmin məsafədən telefonun göndərdiyi siqnalları qəbul edir. Khan evdəki sistemi düzəldib ikinci bluetooth modulu ilə avtomobilin yanına gedir. Evdəki birinci bluetooth modulunun göndərdiyi siqnalları avtomobilin yanında ikinci bluetooth modulundan əks etdirərək avtomobilin kilidini açır.
Güclü bir təhlükəsizlik səddinin olmaması bu prosesi asanlaşdırır. Sadə işlərdə də istifadə olunan belə bluetooth avadanlıqlarının qiyməti 100$ ətrafında dəyişir. Niyyəti pis olan şəxslərin bu cihazları alıb öz məqsədləri üçün istifadə edəcəyi istisna edilmir. Ona görə də xüsusilə şirkətlər təhlükəsizlik standartlarını inkişaf etdirməlidirlər. 2 il keçməsinə baxmayaraq elə Tesla şirkətinin özü problemi həll etməkdə maraqlı görünmür. 2019-cu ildə RSA Rele üsulu ilə baş tutmuş oğurluq, indi də bluetooth siqnalları ilə aparılan testlər bunu göstərir. Çünki, digər brendlər də smartfonu açar kimi istifadə etməyə yarayan yeniliklər gətirməkdə maraqlıdırlar.
Bluetooth siqnalları ilə telefona bağlana bilən avtomobiliniz varsa oğurluğun qarşısını bir neçə üsulla ala bilərsiniz. Bluetooth lazım deyilsə bağlı saxlamağınız məsləhətdir. Lakin RSA Rele üsulunda bunu edə bilməyəcəksiniz deyə açarı evin mərkəzində bir yerə qoymağınız məntiqli ola bilər. Tesla sahiblərinin işi biraz asandır. PIN ilə hərəkətə gətirmək rejimini Tesla modellərində aktivləşdirmək olar. Lakin yenə də qapının kilidi açılacaq. Yəni avtomobilin içindəki əşyaların oğurlanması mümkündür. Sultan Qasim Khan tərəfindən çəkilmiş videonu aşağıdan izləyə bilərsiniz:
