Keçmiş OpenAI texniki direktoru, süni intellekt dünyasında əhəmiyyətli bir ad olan Mira Murati, Thinking Machines Lab adlı yeni müəssisəsini elan edib. Belə ki, keçmiş OpenAI lideri Muratinin yeni şirkətinin əsas məqsədi AI sistemlərini daha başa düşülən, fərdiləşdirilə bilən və insanların ehtiyaclarına uyğunlaşdırmaqdır. Murati və onun startapı ümumi qabiliyyətli süni intellekt sistemləri yaratmaq üçün alətlər hazırlamaq məqsədi daşıyır.
Muratinin baş direktoru olduğu Thinking Machines Lab, OpenAI həmtəsisçisi John Schulman-ı baş alim, OpenAI-nin keçmiş tədqiqat rəhbəri Barret Zofu isə texniki direktor vəzifəsinə gətirib. Şirkətin əməkdaşları arasında təkcə OpenAI-dən olanlar deyil, həmçinin Character AI və Google DeepMind kimi aparıcı şirkətlərin digər 29 əməkdaşı da var. Şirkətin bloq yazısına görə, mövcud süni intellekt sistemlərinin imkanları sürətlə yaxşılaşsa da, bəzi fundamental çatışmazlıqlar hələ də həll olunmamış qalır. Ən böyük problemlərdən biri odur ki, qabaqcıl AI modellərini necə öyrətmək barədə biliklər yalnız bir neçə böyük tədqiqat laboratoriyasında cəmləşib. Bu, həm süni intellektlə bağlı ictimaiyyəti məlumatlandırmağı, həm də onu fərdi ehtiyaclar üçün fərdiləşdirməyi çətinləşdirir.
Thinking Machines Lab multimodal sistemlər inkişaf etdirərək insanların süni intellektlə daha effektiv işləməsini təmin etmək məqsədi daşıyır. Şirkət elm və proqram mühəndisliyi kimi sahələrdə inqilab edəcək modellərin istehsalına diqqət yetirəcək. Bu prosesdə təhlükəsizlik də əsas prioritet olacaq. Tesla-dan ayrıldıqdan sonra Murati 2018-ci ildə OpenAI-yə tətbiqi süni intellekt və tərəfdaşlıqlar üzrə vitse-prezident kimi qoşuldu və 2022-ci ildə texniki direktor vəzifəsinə yüksəlmişdi. Sam Altmanın 2023-cü ilin noyabrında OpenAI CEO-su vəzifəsini qəfil tərk etməsindən sonra qısa müddət ərzində müvəqqəti icraçı direktor vəzifəsini də icra edən Murati keçən il şirkəti tərk etmək qərarına gəlib. OpenAI-də Murati ChatGPT, DALL-E və GitHub Copilot kimi layihələrə rəhbərlik edirdi. Thinking Machines Lab-ın süni intellekt dünyasında necə fərq yaradacağını isə sadəcə izləyib görmək qalır.
