Yuxarıdakı şəklə baxdığınız zaman mərkəzdəki qara dəliyin genişləndiyini görürsünüzmü? Əgər belədirsə bu o deməkdir ki, siz də əksər insanlar kimisiniz və beyniniz hətta tunelə girdiyinizi belə düşünə bilər. Bu illüziyaya baxan insanların təxminən 86 faizi təsirlənir. Daha doğru izah eləsək dəliyin genişləndiyini görürük amma bu beynimizin bizə oynadığı bir oyundur. Yerdə qalan 14 faiz insan isə bunu normal bir şəkil kimi görür. Oslo Universitetinin professoru Bruno Laengin rəhbərlik etdiyi son araşdırmanın bir hissəsi olaraq, normal görmə qabiliyyətinə malik 50 yetkin test fərdindən (31 qadın, 19 kişi) qara dəlik optik illüziyasına baxılması istənilib.
Onlar qara dəliyin müxtəlif rəng birləşmələrində 26 versiyasına baxıblar. Testdə göstərilən kombinasiyalardan ağ fonda qara ləkə və nöqtələr olan variant ən güclü reaksiyanı verib və iştirakçıların təxminən 86 faizi dəliyin genişləndiyini hiss etdiyini bildirib. Üstəlik məlum olub ki, illüziyanın qavrayışı nə qədər çox olarsa, illüziyaya baxan şəxsin göz bəbəkləri bir o qədər şüursuz şəkildə genişlənir. Bu, onların beyinlərinin sanki daha çox işığı qəbul etmək üçün göz bəbəklərini daha geniş açaraq qaranlıq tunelə girdiyi kimi reaksiya verdiyini göstərir.
Tədqiqatçılar izah edirlər ki, göz bəbəyinin genişlənməsi ona görə baş verir ki, bizim vizual neyron şəbəkəmiz birbaşa bizə təqdim olunan məlumatları görməkdənsə, bu məlumatın gələcəkdə necə dəyişəcəyini proqnozlaşdırır. Beləliklə, beynimiz bu görüntünün xaricə genişləndiyini təsəvvür edir və buna uyğun reaksiya verir. Burada biz yeni qara dəlik illüziyasına əsaslanaraq sübut edirik ki, göz bəbəyi bizim işığı necə qəbul etdiyimizə bağlı olaraq reaksiya verir. Ümid edilir ki, bu tapıntılar görmə sistemimizin ətraf dünyanı anlama qabiliyyətimizin daha yaxşı öyrənilməsinə kömək olacaq.
Əlavə olaraq tədqiqatçıların fikrincə, irəli getmək kimi hiss edilən xəyali hərəkət hadisəsi yəqin ki, zehnimizin bizi ətraf mühitdəki dəyişikliyə hazırlamaq üsuludur. Parlaq bir mühitdən qaranlıq tərəfə keçidi qəbul edən görmə sistemimiz, sanki vizual olaraq hərəkət edirmiş kimi düşünməyimizə səbəb olur. Bəs siz bu haqqda nə fikirləşirsiniz? Siz bu illuziyaya baxdıqda təsirləndinizmi? Fikirərinizi bizimlə bölüşməyi unutmayın!
