İKT sahəsində böyük vergi və sosial güzəştlərlə bağlı yeni qanun layihələri 2023-cü il tarixindən 10 il müddətinə mühüm vergi, sosial və miqrasiya güzəştləri təklif edir. Məsələn, Texnoparka rezident olan və sistem inteqrasiyası, proqram təminatının hazırlanması fəaliyyəti ilə məşğul olan sahibkarlar 10 il müddətinə ƏDV, gəlir vergisi, dividend, əmlak, torpaq ödənişindən azad edilir. Sığorta ödənişində güzəştlər təqdim olunur və seçim imkanları yaradılır.
Eyni zamanda xarici mütəxəssislər üçün maneəsiz iş imkanları yaradılır. Bu kimi imkanlar üçün texnoparklara rezident olmaq kifayət edir. Bütün bunların əsas məqsədi ökədə İKT sahəsi üzrə karyera hədəflərini artırmaq, xarici mütəxəssislərin ölkəyə cəlbinin təmin edilməsinə təsir göstərməkdir. Həmçinin, İKT sahibkarlığını inkişaf etdirmək, İT mütəxəssislərin sayının artmasına yeni qanunlarla təkan verilməsi nəzərdə tutulur.
Qanun layihəsi texnoparka rezidenti olan fiziki və hüquqi şəxslərə hansı güzəştləri təqdim edir?
- İKT sahəsində çalışan işçilərə vergi güzəştləri təqdim edir: Texnoparka rezident olan, sistem inteqrasiyası və proqram təminatının hazırlanması sahəsində fəaliyyət göstərən sahibkarlıq subyektlərində çalışan muzdlu işçilərin gəlir vergisi 2023-cü il yanvarın 1-dən 3 il müddətində aylıq gəlir 8000 manatadək olduqda 0 faiz, 8000 manatdan çox olan məbləğin 5 faizi, 01.01.2026-cı ildən 7 il müddətinə isə gəlirin 5%-i həcmində ödəniləcək.
- İKT sahibkarları bəzi vergilərdən azad olunur: Texnoparka rezident olan və sistem inteqrasiyası və proqram təminatının hazırlanması fəaliyyəti ilə məşğul olan sahibkarlar 10 il müddətinə ƏDV, gəlir vergisi, dividend, əmlak, torpaq ödənişindən azad edilir.
- Texnopark daxilində fəaliyyət göstərmədən rezident olmaq mümkün olacaq: Texnologiyalar parkından kənar fəaliyyət göstərən İKT sahibkarlıq subyektləri də texnologiyalar parkının rezidenti sayılacaq.
- Sığorta ödənişində güzəştlər təqdim olunur: Texnoparka rezident olan, sistem inteqrasiyası və proqram təminatının hazırlanması fəaliyyəti ilə məşğul olan sahibkarlar, habelə onların podratçısı və subpodratçıları 10 il müddətinə məcburi dövlət sosial sığortası ödənişindən azad olunacaqlar.
- Sosial sığorta ödənişi üçün seçim imkanları yaradır: 2023-cu il yanvarın 1-dən 10 il müddətində texnoparkın rezidentləri, onların podratçısı və subpodratçısı, eləcə də işçiləri məcburi dövlət sosial sığorta haqqını öz seçimlərindən asılı olaraq ya minimum aylıq əmək haqqı məbləğinin dörd misli miqdarından ya da muzdlu işdən əldə edilən gəlirlərdən indiki qaydada davam edərək ödəyə biləcəklər.
- Xarici mütəxəssislər üçün maneəsiz iş imkanları yaradır: Texnoparkın rezidentləri və onlar tərəfindən Azərbaycan Respublikasının ərazisində işləmək üçün cəlb edilmiş İKT sahəsində təcrübəsi olan əcnəbi mütəxəssislər üçün iş icazəsinin alınması tələb olunmur.
Hansı fəaliyyət sahələri ilə məşğul olanlar rezidentlik üçün müraciət edə bilərlər?
- Sistem inteqrasiyası üzrə fəaliyyət göstərənlər: qurğu və avadanlıqların, o cümlədən kompüter sistemlərinin və əlaqəli komponentlərin istehsalı, həmin məhsulların iş (xidmət) proseslərinə inteqrasiyası və tətbiqitexnoloji qurğu və avadanlıqların, o cümlədən kompüter sistemlərinin və əlaqəli komponentlərin iş (xidmət) proseslərinə inteqrasiyası və tətbiqi.
- Proqram təminatının hazırlanması və inkişafı üzrə fəaliyyət göstərənlər: proqram təminatının (o cümlədən informasiya texnologiyaları, sistemləri, ehtiyatları, informasiyanın mühafizə vasitələri və tətbiqlər üçün) hazırlanması, yaradılması, o cümlədən proqram kodlarının yazılması; proqram təminatının (o cümlədən informasiya texnologiyaları, sistemləri, ehtiyatları, informasiyanın mühafizə vasitələri və tətbiqlər üçün) iş (xidmət) proseslərinə tətbiqi
Rezident olmaq üçün hansı şərtlərə cavab verilməlidir?
Qanunvericilikdə edilən yeni dəyişikliklərin təqdim etdiyi güzəşt və imtiyazlardan yalnız texnoparklara rezident olanlar yararlana biləcək. Həmin rezidentlər aşağıdakı tələblərə cavab verməlidir:
- Hüquqi şəxslər dövlət reyestrində, fiziki şəxslər isə vergi uçotuna qeydiyyata alınmalıdır;
- Kiçik, orta və ya iri sahibkarlıq subyektlərindən birinə aid edilməlidir;
- Vergilərin və digər icbari ödənişlərin ödənilməsi ilə bağlı borcu olmamalıdır; Sahibkarlıq fəaliyyəti üçün lisenziyaya və ya icazəyə malik olmalıdır;
- Müflislik, müvafiq fəaliyyətlə məşğulluğa məhdudiyyət, əmlakı üzərinə həbs və ödənişə yönəlmiş girov olmamalıdır;
- İKT sahəsində ən azı 3 il fəaliyyət göstərməsi və fəaliyyət göstərdiyi dövr ərzində ən azı 1 məhsulun tətbiq edilməsi, o cümlədən satışı şərtdir; İKT sahəsində ən azı 1 il iş təcrübəsi olan mütəxəssislərə sahib olmalıdır;
Nəticədə İKT sahəsində fəaliyyət üçün əlverişli mühit yaradılır. Eyni zamanda Azərbaycan regionun “IT Hub” oyunçusuna çevrilir. Rezident olanlar imtiyazlardan rahatlıqla yararlanır. Rəqəmsal gələcək üçün maneələr ortadan götürülür. Rezidentliklə bağlı aşağıdakı düyməyə toxunub uyğun anketdən müraciət edə bilərsiniz. Əlavə olaraq məlumat üçün [email protected] adresi sizlərin xidmətindədir.
Startap ekosistemi xəbərlərini "İnformasiya və Rəqəmsal İnkişaf Agentliyi" ilə tərəfdaşlığımız çərçivəsində oxuyursunuz.
