Qualcomm yalnız smartfonlar və ya planşetlər üçün çipsetlər istehsal etmir. Şirkət ARM arxitekturasındakı təcrübəsini kompüter tərəfinə gətirir, lakin bildiyiniz kimi hal-hazırda olan prosessorlar çox diqqət çəkmir. Lakin yaxın vaxtlarda bu vəziyyət dəyişə bilər. Belə ki, Oryon brendini sizlərlə ötən aylarda paylaşmışdıq. Oryon, şirkətin Windows kompüterləri üçün hazırlayacağı yeni ARM əsaslı Apple M seriyası rəqibi prosessor olacaq. Bu prosessorların 2023-cü ildə görünməsi və çox yüksək performansa sahib olması gözlənilir. Prosessorların ilk istifadəsi çox güman ki, 2023-cü il ərzində baş tutacaq və Oryon noutbuklarını isə rəsmi olaraq CES 2024 sərgisində böyük bir ehtimalla görəcəyik.
Qualcomm Oryon prosessoru barədə detallar nələrdir?
Hamoa kod adına sahib Oryon prosessoru barədə ilkin texniki detallar məlum olub. Ən son məlumatlara görə bu prosessor 12 nüvəli arxitekturaya sahib olacaq. Xüsusilə prosessorun 3.4 GHz tezlikdə işləyən 8 yüksək performanslı və 2.5 GHz tezlikdə işləyən 4 səmərəli nüvələr üzərində qurulduğu bildirilir.
Həmçinin, prosessor UFS 4.0 yaddaş və LPDDR5X RAM dəstəyi ilə hazırlanmışdır. Kuba Wojciechowski adlı insayderin verdiyi məlumata görə Snapdragon 8 Gen 2 çipsetində istifadə olunan Adreno 740 qrafik çipi bu prosessora inteqrasiya olunacaq. Lakin Oryon prosessoru hələ də inkişaf etdirildiyi üçün yekun məhsulda Snapdragon 8 Gen 3 ilə eyni qrafik çipi görə bilərik. Eyni zamanda bu qrafik çipin Oryon prosessorunda daha yüksək performans verəcəyi gözlənilir.
İki USB 3 portu ilə 10 Gbps, eləcə də DisplayPort 1.4a və eyni zamanda üç ədəd USB 4 (Thunderbolt 4) bağlantısını dəstəkləyəcəyi bildirilir. Prosessor eyni zamanda 4K/120FPS keyfiyyətə qədər video kodeklərini işləyə və AV1 dəstəyi verə biləcək. keyfiyyə dəstəyi də gətirəcək. Bu prosessorun arxasında əsasən Nuvia dayanır.
Xəbər verildiyi kimi, şirkət Hamoa kod adlı prosessoru üçün Nuvia şirkətinin Phoenix arxitekturasından istifadə edir. Hansı ki, bu arxitektura Apple prosessorlarını istehsal edən mühəndislərin, Apple M seriyası çıxdığı müddətdə, ayrılıb Nuvia şirkəti yaradılan zaman təkmilləşdirdikləri ilk arxitektura idi. Qualcomm şirkəti Nuvia şirkətini təxminən 1,4 milyard dollara aldı. Nəticədə hal-hazırda dolayı olaraq Apple M seriyasındakı qədər effektiv bir prosessorun Windows cihazlar üçün təkmilləşdirildiyini söyləmək mümkündür. Nuvia, Qualcomm-un bazardakı gələcəyi üçün həqiqətən də vacib görünür.
