Çoxları gündəlik istifadə etdiyimiz tətbiqlərin belə süni intellektlə idarə olunduğundan xəbərdar deyil. Süni intellekt həyatımızın bir çox yerində işlərimizi xeyli asanlaşdırır. Məsələn, istifadə etdiyimiz “Siri, Google Assistent” kimi rəqəmsal köməkçilər, naviqasiya tətbiqlərindəki optimal marşrutların işlənib tapılması, axtarış sistemlərindəki tövsiyələr və.s hamısı süni intellekt ilə əlaqəlidir. Bunlar süni intellektin tətbiq olduğu sadə nümunələrdəndir. Lakin şirkətlər süni intellekti daha böyük və insanlarla birbaşa əlaqəli sahələrdə də tətbiq etməyə çalışırlar. Onlardan sizə ən yaxın olanı bəlkə də elə müasir avtomobillərinizdəki ikinci səviyyə üzəri avtopilot sistemləridir. Avtomobilin real vəziyyətdən aslı olaraq fərqli qərarlar verməsi zamanla öyrədilmiş alqoritmlər hesabına baş verir ki, biz bu alqoritmləri “süni intellekt” adlandıra bilərik. Lakin avtopilot və süni intellekt bağlılığı tək avtomobil sənayesi ilə limitli qalmır. Mütəxəssislər aviasiya sahəsində təyyarələri tamamilə avtomatlaşdıra biləcək süni intellekt əsaslı avtopilot hazırlayırlar.
Yerdəki xaos havada olmadığından, təyyarələri süni intellekt əsaslı avtopilot daha təhlükəsiz idarə edə bilər
Carnegie Mellon Universitetinin tədqiqatçıları ABŞ-də yerləşən Allegheny County və Pittsburgh-Butler hava limanında toplanan həqiqi datalar ilə süni intellekt inkişaf etdirirlər. Təyyarələri süni intellekt ilə idarə edəcək avtopilot sistemi mövcud olan cihazlardan və dispetçerlərdən məlumat alma bacarığına malikdir. Maraqlı cəhəti ondadır ki, süni intellekt başqa pilotlardan, hava limanından gələn radio danışıqlarını smartfonunuzdakı rəqəmsal köməkçiniz kimi başa düşür və səslə cavablayır.
Texniki cəhətdən süni intellekt 6 köməkçi kamera və xüsusi kompüter istifadə edir. Bütün uçuş zamanı canlı analiz aparma qabiliyyətinə malikdir. Başqa təyyarələri də real zamanlı olaraq görən süni intellekt uçuş zamanı təhlükəsizliyi maksimum dərəcədə təmin etməyi bacarır.
Təyyarələri idarə etmək üçün hazırlanan süni intellekt əsaslı avtopilot sistemi artıq simulatorlarla test edilir. 2 fərqli simulatorla aparılan testlərdə bir təyyarəni insan idarə edərkən, digərini süni intellekt idarə edib. Yaradılan qəza (toqquşma) ssenarilərində süni intellektin idarə etdiyi təyyarə qəzadan yayınmağı bacarıb.
İlkin mərhələdə bu böyük imkanlara malik süni intellekt əsaslı avtopilotun uçan taksilər və logistik dronlar kimi kiçik sahələrdə real testlərdən keçirilməsi planlaşdırılır. Bəlkə də yaxın illərdə olmasa da gələcək illər üçün hədəf təyyarələri bu və bənzəri avtopilotlar ilə tam avtonomlaşdırmaqdır. Nəticədə aviasiya sahəsi qədər hər şeyin “saat” kimi işlədiyi fərqli sektorlar barmaqla sayılacaq qədər azdır. Şirkətlər xərcləri azaltmaq və fəaliyyəti bir növ vahid bir sistem üzərindən idarə etmək üçün bu sahələrə daha çox məbləğ ayıracaqlar.
Siz bu mövzu barədə nə düşünürsünüz? Süni intellektlə idarə olunan təyyarələrlə səyahət etmək istərdiniz?
