Bulud oyun sisteminə yeni ad daxil olur. Belə ki, Samsung texnologiya sahəsində qazandığı uğurları davam etdirərək özünün bulud oyun xidmətini istifadəyə verəcək. Maraqlısı budur ki, cənubi koreya nəhənginin yeni bulud oyun xidmətində əsas diqqət mobil oyunlara ayrılacaq. Bununla da şirkət smartfon satışlarında ciddi müsbət nəticə əldə edəcək. Samsung Galaxy smartfon və planşet modellərində əvvəlcədən quraşdırılmış Game Launcher proqramında bulud oyun infrastrukturu təklif edəcək.
Qeyd edək ki, oktyabrın 5-də Samsung Developer Conference 2023 çərçivəsində beta versiyadan buraxılacaq və hər kəs üçün açılacaq xidmət Amazon Luna, Microsoft Xbox Cloud Gaming və Nvidia GeForce Now-dan fərqli olaraq böyük oyunlara deyil, xüsusi olaraq mobil oyunlara yönələcək. Əslində texnologiya nəhənginin bu addımı biraz qəribədir, çünki Galaxy cihazları artıq asanlıqla mobil oyunları işlədə bilir. Bununla belə, şirkət hələ də bəzi oyunların yükləmə problemi olmadan internet transferi ilə sürətlə oynanılmasını istəyir.
Bundan əlavə bu xidmətin pullu olub-olmayacağı hələlik məlum deyil. Ümumiyyətlə Samsung uzun müddətdir ki, bulud oyunlarına əhəmiyyət verir. Son aylarda şirkət smart televizor modellərinin əksəriyyətinə çoxlu bulud oyun xidməti təklif edib. Belə ki, bunlar Xbox Game Pass, GeForce Now, Amazon Luna, Utomik və Blacknut kimi xidmətlərdir. Bu addım təbii ki, istifadəçilər üçün əla görünür, adı çəkilən bulud oyun xidmətləri sayəsində televizorları yüksək sürətli internet üzərindən çox güclü oyun sistemlərinə çevirmək olar. Yaxında isə şirkət öz oyun xidmətini də istifadəçilərə təqdim edəcək.
