Azərbaycanın İnnovasiya və Rəqəmsal İnkişaf Agentliyi (İRİA) və qlobal innovasiya platforması “Plug and Play” tərəfdaşlığı çərçivəsində həyata keçirilən “GOAL” proqramı uğurla davam edir.
Proqramın yekun mərhələsi olaraq, seçilmiş 5 Azərbaycan startapı hazırda ABŞ-nin “Silikon Vadisi”ndə səfərdədir. Səfər çərçivəsində yerli sahibkarlarımız “Plug and Play” şirkətinin təsisçisi və baş direktoru Saeed Amidi ilə xüsusi görüş keçirərək, beynəlxalq bazarlara inteqrasiya imkanlarını müzakirə ediblər.
Bu ilin 13 aprel tarixində başlayan və 26 mayadək davam edəcək “GOAL” (soft landing) proqramının əsas məqsədi yüksək potensiallı yerli layihələrin qlobal miqyasda rəqabətədavamlılığını artırmaqdır. İştirakçılar proqramın ilk mərhələlərində yeni bazarlara adaptasiya və investisiya cəlbi kimi strateji bacarıqlara yiyələndikdən sonra, prosesin son iki həftəsini birbaşa texnologiya dünyasının mərkəzi olan “Silikon Vadisi”ndə həmin 5 startapın intensiv inkişafı üçün nəzərdə tutulmuş mühitdə keçirirlər.
Saeed Amidi ilə baş tutan görüşdə startapların davamlı inkişaf perspektivləri və “Silikon Vadisi”ndəki geniş imkanlar ətrafında fikir mübadiləsi aparılıb. Dünyanın ən böyük akseleratorlarından birinin rəhbəri kimi çıxış edən Amidi qlobal bazarda uğur qazanmağın sirləri və vençur kapitalı şəbəkələrinə çıxış yolları barədə peşəkar təcrübələrini yerli komandalarımızla bölüşüb. Bu cür təmaslar startaplarımıza beynəlxalq təcrübəni öyrənmək, investorlarla birbaşa əlaqə qurmaq və qlobal innovasiya mühitinə inteqrasiya etmək üçün misilsiz fürsətlər yaradır.
Səfər zamanı azərbaycanlı nümayəndə heyətinin, həmçinin “Plug and Play” tərəfindən təşkil olunan, minlərlə qlobal şirkət və investorun qatıldığı ənənəvi “Silicon Valley Summit”də iştirakı da nəzərdə tutulur. Görüşdə vurğulanıb ki, həyata keçirilən bu tip strateji təşəbbüslər müzakirə olunan layihələrin növbəti böyümə mərhələsinə keçidi üçün yeni perspektivlər açır və Azərbaycanın innovasiya ekosisteminin qlobal şəbəkəyə sürətli inteqrasiyasında mühüm rol oynayır.
