İnnovasiya və Rəqəmsal İnkişaf Agentliyi (İRİA) və “Tedspace”in təşkilatçılığı, Bakı Şəhəri Nərimanov Rayon İcra Hakimiyyətinin tərəfdaşlığı ilə keçirilən “Openwave” hakatonuna ev sahibliyi edəcək məkan rəsmən açıqlanıb.
Qeydiyyatı davam edən və böyük maraqla qarşılanan bu genişmiqyaslı texnoloji yarışma Azərbaycan İnnovasiya Mərkəzində baş tutacaq.
Azərbaycan İnnovasiya Mərkəzi 48 saatlıq marafon ərzində gənc proqramçılar, dizaynerlər və innovasiya həvəskarları üçün fasiləsiz iş, eləcə də rəqabət mühiti təmin edəcək. İştirakçılar məhz bu məkanda Nərimanov rayonunun ərazi idarəetməsinin rəqəmsallaşdırılması üçün tələb olunan innovativ həllər (mobil tətbiqlər, idarəetmə panelləri, vəziyyət xəritələri) üzərində çalışacaqlar.
son qeydiyyat tarixi və mükafat fondu
- Daha öncə verilən məlumata görə, bu genişmiqyaslı yarışmaya müraciət üçün son tarix 24 may 2026-cı il olaraq müəyyən edilmişdir. Qaliblər üçün ümumi 10 000 AZN məbləğində mükafat fondu nəzərdə tutulub. Ən yaxşı rəqəmsal həlləri təqdim edən ilk 3 komanda bu mükafat fondundan öz payını alacaqdır.
“Openwave” fəlsəfəsinə qoşularaq şəhərin gələcəyini dəyişəcək kodları yazmaq istəyən hər kəs göstərilən tarixədək komandasını formalaşdırıb qeydiyyatdan keçməyə dəvət olunur. Tədbirin rəsmi media tərəfdaşı “Tedroid” platformasıdır.
