Hal-hazırda Google şirkəti Android əməliyyat sisteminə yeniliklər gətirdikcə imkanları məhdudlaşdırmaqla bağlı toxunuşlar etməyə maraqlı görünür. Çünki, imkanlar nə qədər məhdudlaşdırılarsa, başda təhlükəsizlik problemlərindən və eyni zamanda optimizasiyalar baxımından əməliyyat sistemi Google şirkəti üçün daha ideal təkmilləşdirilən bir əməliyyat sisteminə çevrilir. Belə ki, bu gün bir çox istifadəçi istədiyi tətbiqi APK formatında cihazına quraşdırıb tətbiqin istədiyi versiyasını rahatlıqla istifadə edə bilir. Lakin Google şirkəti Android 14 ilə bu istiqamətdə atacağı ilk məhdudlaşdırıcı addımla bağlı məlumat verib.
Android 14 ilkin mərhələdə Android 6.0 və daha köhnə versiyalar üçün hazırlanmış APK faylların quraşdırılmasını dəstəkləməyəcək
Məlumata görə, Android 14 köhnə tətbiqlərin APK fayllarını cihazlara quraşdırılmasını tamamilə bloklayaraq API tələblərini sərtləşdirəcək. Google, zərərli proqramlardan gələn təhdidləri azaltmağı və eyni zamanda tərtibatçıları daha yeni əməliyyat sistemləri üçün tətbiq hazırlamağa sövq etməyi hədəfləyir.
İlkin mərhələdə Android 14 xüsusi olaraq Android-in köhnə versiyalarını hədəfləyən proqramları bloklasa da sonrakı mərhələlərdə bu vəziyyət dəyişə bilər. Qeyd edilir ki, zamanla Google şirkəti Android Marshmallow həddini yüksəldəcək və hər yeni Android yeniləməsi ilə tələbləri daha da sərtləşdirəcək. Lakin Android 14 yayımlanana qədər tələbin daha da yüksəldilib-yüksəldilməyəcəyi naməlumdur.
Verilən məlumatda qeyd edilir ki, Android 14 ilə köhnə APK fayllarının quraşdırılmasının bloklanması əslində təhlükəsizlik üçün çox mühimdir. Çünki, əksər hallarda zərərli proqramlar Android əməliyyat sisteminin köhnə versiyaları üçün yazılmış olur. Köhnə əməliyyat sisteminin boşluqları nəzərə alınaraq təkmilləşdirilmiş təhlükəli tətbiqlər yeni nəsil cihazlarda da problemlərin artmasına səbəb yaradır.
Bundan əlavə Google Play mağazasında yayımlanan tətbiqlərə də minimum Android 12 dəstəkləmə məcburiyyəti qoyulub və Android 12 əməliyyat sistemini dəstəkləməyən tətbiqlərin mağazada qalması mümkün olmayacaq. Nəticədə köhnə tətbiqlər mağazadan yığışdırılacaq.
