Çox təəssüf ki, Huawei şirkəti sanksiyaların yaratdığı çətinliklər səbəbi ilə yetəri qədər rəqabətcil olub əvvəlki kimi tez-tez yeni modellərini bazara çıxara bilmir. Sonuncu dəfə Huawei Mate 40 seriyası 2020-ci ildə yenilənmişdi. Həmin təqdimatdan demək olar 2 ilə yaxın vaxt keçdikdən sonra bu gün səhər saatlarında nəhayət, gözlənilən tədbir baş tutdu. Beləliklə, Huawei şirkətinin zirvəsini təmsil edən Huawei Mate 50 seriyası təqdim edildi. Çox uzatmadan səbirsizliklə gözlənilən modellər barədə danışmağa başlayaq!
Keçirilən təqdimat tədbirində Huawei şirkəti 4 yeni model qarşımıza çıxarıb. Cihazlardan Mate 50 RS və Mate 50 Pro ayrılıqda eyni gövdəni daşıyan, Mate 50 və Mate 50E isə özlüyündə eyni gövdəni paylaşan smartfonlar hesab edilirlər. Smartfonların dizaynı Mate 50 RS xaric çox bənzərdir. Arxa tərəfdə dairəvi kamera modulu istifadə olunub. Kamera sensorları isə eyni Mate 40 seriyasına bənzər formada dairəvi kamera modulu daxilində mövhumi düzbucaqlı şəklində düzülüb. Diqqət çəkən detal isə kamera modulunun kənarları boyunca haşiyələnən xüsusi işləmədir ki, cihaza premium görünüş qatıb. Sadə Mate 50 və Mate 50E modellərində çərtiksiz, lakin heç bir qıvrımı olmayan düz ekran paneli istifadə edilib. Mate 50 Pro və Mate 50 RS isə yanlardan qıvrımlı və çərtikli ekran paneli ilə bizi qarşılayır. İndi isə Huawei Mate 50 seriyasının texniki xüsusiyyətlərinə daha dərindən nəzər salaq.
Huawei şirkəti smartfon kameralarına Mate 50 seriyası ilə yeni terminlər gətirir
Bu məqaləmizdə texniki xüsusiyyətlərə mütləq kameralardan danışaraq başlamalıyıq. Çünki, Huawei şirkəti adətən “biz sarsılmazıq” deyərək Mate 50 seriyası ilə kamera sektoruna ciddi yeniliklər gətirir. 4 smartfonda da əsas kamera sensoru deyə bir şey yoxdur. Huawei şirkəti əsas kamera yerinə, 50MP IMX766 əsaslı özəlləşdirilmiş RYYB sensoruna malik və OIS ilə gücləndirilmiş super-optik kamera istifadə edir. Super-optik kamera isə nə az, nə çox tam olaraq F/1.4 – F/4.0 arası dəyişə bilən aktiv diafraqmaya malikdir. Nəticədə obyektivdən keçən işıq miqdarı yüksək səviyyədə tənzimlənə bilir. Lakin super-optik kamera, əsas kameranı əvəzlədiyindən telefoto kamerası kimi işlədilmir. Telefoto kameraları cihazlara əlavə olaraq quraşdırılıb.
Mate 50 RS modeli üçün isə eksklüziv olaraq ikinci bir yeni kamera, yeni termin, yeni texnologiya gətirilir. Belə ki, bu smartfon ultra-makro telefoto kamerası əldə edib. Normal telefoto kamerası kimi F/3.0 diafraqmalı 48MP IMX688 əsaslı RYYB sensoru OIS dəstəyi ilə 3.5 qat yaxınlaşdırma edə bilir. Lakin adətən, peşəkar fotoaparatlarla çəkilmişcəsinə 2700 mm uzaqlıqdan işıq sensoru, lazer avtofokus və 10 kanallı multispektral rəng sensoru dəstəyi ilə möhtəşəm makro görüntülər çəkə bilir. Kameraların necə işlədiyini təsəvvür etmək isə həqiqətən asan deyil.
Ultra-makro telefoto kamerası, super-optik kamera kimi bütün modellərə quraşdırılmayıb. Mate 50 Pro modelində OIS dəstəkli 64MP OV64B sensoru 3.5 qat, Mate 50 modelində OIS dəstəkli 12MP IMX663 sensoru 5 qat optik yaxınlaşdırma edir. Mate 50E isə ümumiyyətlə telefoto sensoru ilə təchiz edilməyib. Bütün cihazlara super-optik kameradan əlavə 13MP IMX688 əsaslı ultra-geniş bucaqlı kamera da quraşdırılıb. Dördüncü kamera kimi görünən hissədə isə 3D ToF, avtofokus və.s tipli sensorlar mövcuddur. Huawei bu cihazlarda LEICA yerinə, şirkətin təsis etdiyi XMAGE brendinin adını çəkir. Yeni smartfonların imkanları isə sanki, indiyə qədər LEICA əməkdaşlığının sadəcə “sponsorluqdan” artığı olmadığını təsdiq edib. Selfi kamerası da cihazların hamısında eynidir və 13MP təsvir ölçüsünə malikdir. Huawei Mate 50 Pro və Mate 50 RS çərtik daxilində 3D üz skaneri ilə də təmin edilib.
Smartfonların digər texniki xüsusiyyətləri
Huawei Mate 50 RS, Mate 50 Pro və Mate 50 üçlüsü öz gücünü Snapdragon 8+ Gen 1 çipsetindən alır. Lakin bu cihazlar 5G dəstəyinə malik deyillər. Bunun üçün xüsusi 5G dəstəkli keys nəzərdə tutulub. Mate 50E modeli isə Snapdragon 778G çipsetinə sahibdir və bu modeldə də yalnız 4G bağlantısı mövcuddur.
Android və Apple istifadəçiləri hələ vədləri gözləyərkən, Huawei şirkəti “Beidou Satellite Message 3” protokolu üzərindən işləyən peyk bağlantısı dəstəyini də səssizcə bu cihazda istifadəyə verib. Şəbəkə bağlantısı olmadan mesaj və GPS məlumatlarını peyk bağlantısı ilə rahatlıqla ötürə bilərsiniz.
Seriyanın ən güclü cihazları olan Huawei Mate 50 Pro və Mate 50 RS modelləri 6.74 düymlük OLED ekranla təchiz ediliblər. 120Hz tezlikli bu ekran paneli 2K təsvir ölçüsünə malikdir. 1440Hz tezlikli PWM texnologiyasını dəstəklədikləri üçün gözə zərərləri də minimumdur. Smartfonlara Huawei Kunlun Glass adlı ekran qoruyucu işlədilib və zərbələrə qarşı SGS tərəfindən ən yüksək 5 ulduz sertifikatı alıb.
Seriyanın daha zəif bəndləri Huawei Mate 50 və Mate 50E modellərində isə 6.7 düymlük 90Hz tezlikli OLED ekran paneli istifadə olunub. 2K təsvir ölçülü bu ekranlarda da 1440Hz tezlikli PWM texnologiyası mövcuddur. Qeyd edək ki, bütün cihazlardakı ekran panellərinin sensor tezliyi 300Hz təşkil edir.
Mate 50 Pro və Mate 50 RS modelləri 4700 mAs həcmli batareyası 66 Vt naqilli, 50 Vt naqilsiz, 7.5 Vt tərs şarj dəstəkləyir. Digər iki cihaz isə 4460 mAs həcmli 66 Vt naqilli şarj dəstəkləməkdədirlər. Mate 50 modelində Mate 50E modelindən fərqli olaraq 50 Vt naqilsiz və 7.5 Vt tərs şarj mövcuddur. Harmony 3.0 (Hongmeng 3) isə möhtəşəm performans və geniş imkanlar gətirir. Məsələn, cihazların performansını 1% enerji qaldıqda üç saat aktiv qala biləcək şəkildə azaltmaq mümkündür. Əlavə olaraq Mate 50 Pro və Mate 50 RS modelləri gücləndirilmiş IP68 sertifikatı ilə 6 metr dərinlikdə suya davamlıdırlar.
Huawei Mate 50 seriyasının qiyməti
Mate 50 RS modeli sadəcə 12-512GB yaddaş həcmi ilə 1870$ qiymətə təklif edilir. Mate 50 Pro modeli 980$, Mate 50 modeli 720$, Mate 50E modeli isə 580$ başlanğıc qiymət etiketinə sahibdir. Smartfonların qlobal bazara gələcəyi gözlənilmir. Bənzər texnologiyalar Honor Magic seriyasına köçürülərək növbəti illərdən qlobal bazara ayaq açmış brendlə Çin xaricində əlçatan ola bilər.
