Çin mərkəzli ən böyük texnologiya şirkətlərindən biri olan Huawei, çip istehsalı üçün böyük dövlət dəstəyi alır. Bildiyimiz kimi, Huawei uzun müddətdir ki, çoxsaylı ABŞ embarqosuna məruz qalır. Lakin yenədə çinli texnologiya nəhəngi öz hesabına yeni texnologiyalar yaratmağa və dirənməyə davam edir. Hətta Huawei brendinin Mate 60 seriyasında istifadə etdiyi Kirin 9000s çipseti gündəm mövzusu olmuşdu. Vəziyyət o qədər böyümüşdü ki, ABŞ çinli texnologiya nəhənginin yeni çipsetini araşdırmağa başlamışdı.
İndi məlum olub ki, Huawei ABŞ embarqoları və ya sanksiyaları ilə yalnız mübarizə aparmır. Huawei çip istehsalı üçün böyük dövlət dəstəyi alır. Yəni, Çin texnologiya nəhənginə yardım göstərir. Hətta mənbəyə görə Huawei şirkətinə xarici mənbələrdə asılı olmayan və özünü təmin edən çip istehsalı şəbəkəsi yaratmağa kömək məqsədi ilə Shenzhen şəhər hökumətinin investisiya fondu tərəfindən maliyyə dəstəyi göstərilib. Həmçinin Çin hökuməti Huawei şirkətinə dəstək üçün 30 milyard dollarlıq layihəyə də start verib.
Ümumiyyətlə Huawei şirkətinin çin mərkəzli çip istehsalı təkcə özü üçün deyil, digər çin şirkətləri üçün də böyük əhəmiyyət kəsb edir. Habelə çinli çipset fabrikləri də bu vəziyyətdən yararlanır. Hətta Huawei şirkətinin Kirin 9000s çipseti gündəm olarkən Çinli çipset istehsalçılarının səhm dəyərləri yüksəlmişdi. Habelə deyə bilərik ki, Çin ABŞ ilə çip müharibəsində gizli şəkildə Huawei-ni güclü silaha çevirir. Yəni artıq Çin və ABŞ arasındakı mübarizə texnologiya sahəsinə sıçrayıb.
