Dünyada cəsusluq probleminin son dövrlərdə texnologiyanın həyatımızın bir parçasına çevrilməsi səbəbi ilə artdığını bilirik. Lakin Çin İctimai Təhlükəsizlik Nazirliyinin tərəfdaşına dair ortaya çıxan yeni sızıntılar problemin artıq qorxuducu səviyyəyə çatdığını sübut edir. Belə ki, Çin İctimai Təhlükəsizlik Nazirliyi MPS-in iSoon və ya digər adı ilə Anxun adlı tərəfdaşının müxtəlif ölkələrdə cəsusluq etdiyi ortaya çıxıb. Hətta, cəsusluq sənədləri GitHub platformasında açıq-aşkar vəziyyətdə ortaya çıxarılıb.
Ortaya çıxan sənədlərdə şirkətin Hindistan, Tailand, Vyetnam və Cənubi Koreyanın xaricdəki hökumətlərinə, eləcə də bəzi NATO sistemlərinə sızdığı iddia edilir. Bütün əsas əməliyyat sistemləri üçün ixtisaslaşdırılmış RAT yəni uzaqdan idarəetmə proqram təminatı, sosial mediada istifadəçi izləmə, DDoS hücumları, geniş çeşidli zərərli proqram/texniki təchizat Wi-Fi şəbəkələri alətləri sızdırılmış sənədləri əhatə edir. Görünən odur ki, Çin Anxun şirkəti ilə bütün dünyada cəsusluq edirmiş. Sənədlərə daxil edilən mesajlar müxtəlif qurumlar arasında yazışmaları ortaya qoyur, potensial həssas söhbətlərə və əməliyyat detallarına işıq salır. Həmçinin bu mesajlara normal, adi istifadəçi mesajlaşmaları da daxildir.
Çin yerli WeChat platformasından tutmuş Twitter-ə qədər bütün platformalarda cəsusluq edib. Bütün iOS versiyalarında işləyən cəsus proqramının mövcudluğu da xüsusilə diqqəti çəkir. Bu proqram vasitəsi ilə aparat məlumatları, GPS məlumatları, kontaktlar, media faylları və səs qeydləri kimi məlumatların toplandığı da bildirilir. Maraqlısı budur ki, bütün bu sadalananlar üçün heç bir Jailbreak tələb olunmur. Eynilə, Android 6.0 və daha yuxarı versiyalarda işləyən proqram sistem məlumatı, GPS, kontaktlar, SMS, zəng qeydləri, brauzer tarixçəsi, proqramlar siyahısı, real vaxtda səs yazısı, proses siyahısı, kamera, WiFi, ekran görüntüsü, klaviatura qeydləri funksiyalarını yerinə yetirir. Sənədlərdə NATO-nun baş katibi Jens Stoltenberg-ə aid məlumatların olduğu da qeyd edilir.
