Yəqin ki, ən azı bir dəfə siz də smartfonunuzu suya salmısız və ya istəmədən islatmısınız. Təbii ki, suya düşən smartfonu ilk olaraq əksər insan el arasında bilinən həll kimi, düyü ilə dolu bir qaba qoyur və ya saç qurudan aparatlarla qurutmağa çalışır. Lakin Apple şirkəti smartfonları düyü ilə qurudanlara xəbərdarlıq edərək bunun xəta olduğunu bildirir. Texnologiya nəhənginin dəstək xidməti bununla bağlı rəsmi səhifədə paylaşım edib.
Apple şirkəti iPhone-da maye aşkarlandı xəbərdarlığını görənlərə mövcud vəziyyətin həllini izah edib. Belə ki, Apple şirkətinə görə,“iPhone XS, iPhone XS Max, iPhone XR və ya sonrakı seriyaya aid olan modelinizə Lightning və ya USB-C kabeli ya da digər aksesuarı taxarkən giriş portunda maye olarsa iPhone sizə xəbərdarlıq edə bilər. “iPhone modelinizi və aksesuarınızı qorumaq üçün giriş portu, kabel ucları və aksesuar quruyana qədər şarj və ya digər bağlantılar həyata keçirilməməlidir”. Bu məsələdə Apple əlavə olaraq, “İPhone və ya aksesuarınız yaşdırsa” başlığını qeyd edərək burada düyü detalına diqqət çəkib. Texnologiya nəhəngi qeyd edir ki, “Kabeli iPhone-dan, kabelin digər ucunu isə enerji adapterindən və ya aksesuardan ayırın. İPhone və kabel tamamilə quruyana qədər kabeli yenidən qoşmayın. iPhone-unuzun qurumasına icazə verin.”
Apple smartfonları düyü ilə qurutmağa çalışanlara xəbərdarlıq edərək bildirir ki, cihazdakı artıq mayeni boşaltmaq üçün iPhone-u giriş portu aşağı baxacaq şəkildə tutaraq əlinizlə yumuşaq şəkildə vurun. Həmçinin cihazı hava axını olan quru bir yerə qoymaq lazımdır. Texnologiya nəhəngi deyir ki, ən azı 30 dəqiqə gözləyin, sonra Lightning və ya USB-C kabeli ilə doldurmağa və ya aksesuarı birləşdirməyə cəhd edin. Cihazın tam quruması bəzən 24 saat çəkə bilər. Əgər telefonunuz qurudursa, lakin hələ də şarj olmursa, kabeli adapterdən ayırın və gözləyin. Apple qeyd edir ki, xüsusilə bu vəziyyətlərdə cihazınızı xarici istilik mənbəyi və ya sıxılmış hava ilə qurutmağa çalışmayın və ya giriş portuna pambıq çubuqlar, kağız dəsmallar daxil etməyin. Ən önəmlisi isə cihazı düyü ilə dolu qaba qoymayın çünki, kiçik düyü hissəcikləri smartfona zərər verə bilər.
