Ana şirkəti Huawei-dən ayrıldıqdan bir neçə ilə keçdikdən sonra, HONOR smartfon bazarının zirvəsinə yüksəlmək üçün bir-birindən rəqabətcil cihazlar çıxarmağa davam edir. Bəli, bizim hal-hazırda oxuduğunuz icmalımızın qonağı olan HONOR 90, mümkün olan ən çətin rəqabətə malik orta-üst səviyyəli cihazlar arasına daxildir. Hansı ki, rəqib olaraq bir çox flaqman modelləri təkrarlayan dizaynı, keyfiyyətli kamera konfiqurasiyası və stabil performansı ilə fərqlənən prosessoru ilə birlikdə, möhtəşəm təəssürat bağışlayan ekranı ilə diqqət çəkir.
Başlıca olaraq bir detala aydınlıq gətirmək lazımdır. Çünki o, brendin fəlsəfəsinin elementlərini saxlayan və birbaşa Google xidmətləri ilə bağlı problemlərə sahib olmayan bir brend kimi, HONOR qarşımıza çıxır. Bəli, bəziləri hələ də oxuduğumuz rəylərə görə Google servisləri bağlı problemlərin HONOR tərəfində də olduğunu düşünür. Lakin HONOR 90 timsalında bütün HONOR brendinə məxsus smartfonlar üçün rəsmi Google servisləri baxımından hər şey qaydasındadır.
Texniki xüsusiyyətlərə sürətli baxış:
Ekran paneli: 6.7 düym OLED, 1.5K (2664 x 1200 px), 120 Hz, 1600 nit;
Çipset: Snapdragon 7 Gen 1 Accelerated (4 nm, 2.5 GHz | Adreno 644);
Operativ yaddaş: 8/12 GB (LPDDR4x);
Daxili yaddaş: 256/512 GB (UFS 2.2);
Əsas kamera: 200 MP (f/1.9, 1/1.4 düym ISOCELL HP3) + ultra-geniş bucaqlı 12 MP (f/2.2, 112°) + dərinlik 2 MP (f/2.4);
Ön kamera: 50 MP (f/2.4);
Batareya: 5000 mAh, 66 vatt;
SIM: ikili NanoSIM;
Bağlantı texnologiyaları: LTE, 5G, Bluetooth 5.2, Wi-Fi, NFC, eSIM;
ƏS: Android 13, MagicOS 7.1;
Ölçüləri: 161.9 x 74.1 x 7.8 mm;
Çəkisi: 183 qram;
Qutu daxilində nələr var?
HONOR şirkəti smartfonu ağ rəngli sadə bir qablaşdırmaya malik qutu ilə göndərir. Paketi açdığınız zaman siz SIM yuvasını çıxarmaq üçün metal alət, şarj və məlumat ötürmək üçün Type-C kabeli, adapter və qoruyucu keys ilə qarşılaşırsınız. Smartfonun ekranı üzərində isə olduqca şəffaf və nazik qoruyucu örtük quraşdırılmış olaraq gəlir.
HONOR 90 modelinin material keyfiyyəti və dizaynı hansı səviyyədədir?
HONOR 90-ın özündə bir növ nostalji hissiyat var. Çünki, dizayn ənənələrinə sadiq qalan şirkət kiçik yeniləmələrlə köklü dizayn dəyişikliyinə getmir. Cihazın dizaynında həm arxada, həm də öndə simmetrik olaraq yuvarlaqlaşdırılmış kənarlardan istifadə olunur. Hal-hazırda əksər istehsalçılar yuvarlaq hissiyatdan imtina edirlər. Lakin həqiqətən kəskin kənarlı cihazdan belə bir smartfona keçid etdikdə əlinizdə çox erqomonik və yumuşaq bir hissiyatın, məhz elə bu üslubda olduğunu anlaya bilirsiniz. Bəlkə də belə zərif dizayn smartfonun dayanıqlığını müəyyən qədər zəiflədir, lakin digər tərəfdən kənarları yuvarlaqlaşdırılmış smartfon çox rahatdır və istifadəsi xoşdur.
HONOR həmçinin çox incə şəkildə arxa kamera modulunu da dizayn edib və onu xrom bəzəkli iki oval hissəyə ayırıb. Həmin oval hissələr kamera modulunun aqressiv çıxıntı yaratmasının qarşısını alır. Arxa tərəfdə rənglərə bağlı olan və toxunduqda belə fərqlilik yaşadan tekstura ilə birlikdə HONOR 90 modelinin qazandığı şəxsiyyət smartfonu orta-üst seqmentdə premium cihaz kimi göstərir.
Bəlkə də detallara dərindən daxil olsaq, gözləntilərə tam cavab verməyən xırdalıqlar elə məhz istehsal materiallarıdır. Çərçivə və arxa panel plastikdən hazırlanmışdır. Lakin parlaq və kifayət qədər sürüşkəndir. Aldığınız rəngdən asılı olaraq mat arxa qapağa sahib olmayan, xüsusilə Midnight Black modeli barmaq izlərini toplaya bilir. Buna baxmayaraq arxada çirklənmədən qoruyan bir örtük işlədildiyi qeydlər arasındadır, buna görə də bir sürüşdürmə ilə asanlıqla silinir.
Cihazın sol və yuxarı tərəfləri boşdur, sağda isə klassik idarəetmə dəsti olan güc düyməsi və səs tənzimləyicisi mövcuddur. Həssaslıq və reaksiya vermə müddəti mükəmməldir.
HONOR 90 modelinin aşağısında isə SIM yuvası, Type-C portu və bir ədəd dinamik yerləşib. Səs səviyyəsi və səs keyfiyyəti olduqca yaxşıdır, lakin belə bir smartfonun stereo səsdən məhrum olması məyus edicidir.
Onu da qeyd etmək lazımdır ki, HONOR 90 modeli IP sertifikatına malik deyil. Lakin sertifikatın olmamasına baxmayaraq, cihaz yəqin ki, ən azı su sıçramalarına qarşı qorunur. Çünki, SIM yuvasının kənarında tipik silikon kənarlıq var. Yenə də xarici amillər baxımından toz və suya qarşı diqqətli olmağınızı tövsiyə edirik.
HONOR 90 modelinin ən mükəmməl tərəfi ekran ola bilər?
HONOR 90-ı rəqabətdə ən üst daşıyan, flaqman cihazlarla müqayisə olunacaq ekran keyfiyyətidir. 436 ppi piksel sıxlığı təmin edən 1.5K (1200 × 2664 piksel) təsvir ölçüsünə malik 6,7 düymlük OLED paneldən istifad edilir. Ekran 20:9 aspekt nisbətinə, 120 Hz yüksək yeniləmə tezliyinə, 1600 cd/m²-ə qədər parlaqlıq miqdarına malikdir. HDR10+ məzmunun göstərilməsini dəstəkləyir.
Ümumiyyətlə, istifadə olunan paneldə qüsurları tapmaq demək olar ki, mümkün deyil. Rəng dəqiqliyi rəqibləri arasında nümunə göstəriləcək qədərə əladır. Heç bir baxış bucağından hər hansı bir xətanın müşahidə olunması mümkünsüzdür. Maksimum parlaqlıq birbaşa günəş işığının öhdəsindən asanlıqla gəlir.
HONOR 90 modelində ən vacib amillərdən biri isə öz istifadəçilərinin gözlərini qabaqcıl texnologiyalar ilə qorumasıdır. Birincisi, cihaz bazarda ən yüksək PWM qarartma tezliyinə malikdir. Belə ki, 3840 Hz ilə smartfon TUV Rheinland Flicker Free sertifikatını alıb. Bu, gözləri tez yoran və ya qaranlıq mühitlərdə AMOLED-in titrəməsindən baş ağrısı çəkən insanlar üçün vacibdir. Ekran həmçinin TÜV Rheinland Eye Comfort (mavi işığın yaratdığı göz yorğunluğunu minimuma endirir), YouTube və ya Netflix kimi bir çox axın xidmətlərində HDR oxunmasına zəmanət verən Widevine L1 sertifikatı ilə təmin edilib.
Parametrlərdə siz rənglərin tənzimlənməsini, ekran tezliyini (60, 90, 120 hertz və ya dinamik rejim) və hətta təsvir ölçüsünü dəyişə bilərsiniz. Burada üç parametrdən təklif olunur ki, böyük (2664 x 1200), normal (2442 x 1100) və kiçik (1998 x 900) seçimləri araasında təsvir ölçüsü tənzimlənir. Bundan əlavə, məzmunun növünə görə avtomatik tənzimləyən adaptiv seçim də vardır. Always On Display normal olaraq mövcuddur və bağlı ekranda məlumatlar həmişə göstərilir. Smartfonun tətbiq mağazasından AoD-ni fərdiləşdirmək üçün çoxlu saat seçimləri var.
Təhlükəsizlik
Smartfonun kilidini açmaq üçün ekranın altında yerləşən barmaq izi skanerindən istifadə edilir. Yaxşı işləyir və çox nadir hallarda barmağın ilk dəfə tanınmadığı vəziyyətlərlə qarşılaşmaq mümkündür. Həmin nadir hallar isə barmağınız çox çirkli və ya yaş olduqda yaşana bilər. Lakin hər bir halda barmağınızın skanını həyata keçirə bilir.
Digər biometrik kilid açma üsulu isə sifətin tanınmasıdır. Bu üsul ön kameraya əsaslanır, buna görə də funksiya barmaq izi skaneri qədər etibarlı deyil. Bununla belə, gün işığında sürətlidir və eyni zamanda foto göstərmək ilə təhlükəsizlik sistemi aldadıla bilməz. Alqoritmlər real insanı üç ölçülü şəkildə anlamaq üçün yaxşı təkmilləşdirilib.
Smartfonun performansı ve işləməsi necədir?
HONOR 90 modelinin içərisində 4nm texnologiyasından istifadə edərək hazırlanmış səkkiz nüvəli Qualcomm Snapdragon 7 Gen 1 Accelerated Edition çipseti var. Adından göründüyü kimi, ən güclü nüvələrin (Cortex-A710) tezliyinin 2,4 GHz-dən 2,52 GHz-ə qədər artırıldığı 7 Gen 1-in sürətləndirilmiş versiyasıdır. Adreno 644 qrafik sürətləndiricisi görüntülərin işlənməsi üçün cavabdehdir.
Konfiqurasiyadan asılı olaraq, HONOR 90 modeli 8/12 GB RAM LPDDR4X, 7 GB daha çox virtual artım və UFS 2.2 yaddaş standartlı ilə 256/512 GB yaddaş həcmində təklif olunur. Cihaz microSD kartları dəstəkləmir. Soyutma 4,483 mm² buxar kamerası tərəfindən həyata keçirilir, ümumi soyuducu lövhənin sahəsi isə 33,741 mm²-dir.
Smartfon AnTuTu testində 700.000 üzəri nəticə göstərməyi bacarır. HONOR brendinin məlumatına görə, yeni modelin sürəti HONOR 70 ilə müqayisədə 20% artıb və performans testləri də bunu təsdiqləyir. GeekBench 6-da smartfon təqribi 1102/3195 xal, Antutu 10 üzərində minimum 680.000 xal, 3DMark Extreme (High) qrafik testində isə 864 xal toplayır.
Aydındır ki, bu smartfon flaqmanlarla rəqabət apara bilməz, lakin onun performansı gündəlik tapşırıqlar üçün yetəri qədər yüksəkdir. İstər sosial şəbəkələrdə gəzinti, istər mesajlaşma, istərsə də video oyunlar olsun, hər şey sürətli və gecikməsizdir. Tələbkar oyunlar adətən orta-yüksək qrafik parametrlərdə işləyir. Cihaz yük altında demək olar ki, isinmir.
Icmalımızda olan HONOR 90, istifadəçilər üçün olduqca rahat olduğunu düşündüyümüz MagicOS 7.1 interfeysi ilə Android 13 əməliyyat sistemini işlədir. Burada çoxlu funksiyalar, sadə və intuitiv interfeys, həmçinin bir çox təkmilləşdirilmiş parametrlər var. HONOR, həmçinin 2 illik əməliyyat sistemi və 3 illik təhlükəsizlik yeniləmələri vəd edir.
Batareya, şarj və bağlantı texnologiyaları hansı səviyyədədir?
Cihaz standart tutumlu 5000 mAs batareya ilə təchiz olunub ki, HONOR-un fikrincə, bu ağır istifadə zamanı bir gün üçün kifayətdir. Praktikada bunun doğru olduğunü həqiqətən müşahidə etmişik. Əsasən şəkil çəkmək, sosial şəbəkələrdə gəzmək, mesajlaşmaq, videolara baxmaq və zəng etmək üçün istifadə etdikdə enerjini mükəmməl dərəcədə effektiv istifadə etdiyini görmək mümkündür. Həmçinin, telefon adətən fayl transferi və bir neçə saat musiqi dinləmək üçün Bluetooth cihazlarına (qulaqlıq, nearby share və.s) qoşulurdu. Bu ssenari ilə adətən axşam gecə saatlarına qədər 20-30% şarj qalır. Beləliklə, az istifadə etsəniz, bir gün yarım və ya iki gün batareya ömrü əldə etmək rahatlıqla mümkündür.
Orijinal HONOR adapteri ilə doldurulma testində batareya 45 dəqiqə ərzində 0-dan 100%-ə qədər keçdi. Daha ətraflı nəticələrə aşağıdakı cədvəldə baxa bilərsiniz.
HONOR 90 iki NanoSIM kartı dəstəkləyir, lakin rəsmi olaraq qlobal bazara göndərilən versiyalar eSIM-i dəstəkləyir. Əgər tez-tez xaricə gedirsinizsə, bu xüsusi cihazı almağa çalışın. Digər ölkələrdə eSIM ilə siz fiziki olaraq SIM kart almalı olmayacaqsınız. Tarifi onlayn aktivləşdirə, ödəyə və dərhal istifadə edə bilərsiniz. Qeyd etməliyik ki, düşünmədiyiniz qədər əla üstünlükdür.
Yeni HONOR 90-da 3,5 mm-lik qulaqlıq girişi yoxdur, ona görə də alıcılar simsiz qulaqlıqlarla kifayətlənməli olacaqlar. Cihaz aptX audio kodekləri (aptX HD daxil olmaqla) ilə Bluetooth 5.2-ni dəstəkləyir və qoşulma ilə bağlı heç bir problem olmadan bir çox TWS ilə yaxşı işləyir.
HONOR 90 seriyası kamera paramterləri baxımından nə vəd edir?
Kameralara gəldikdə, HONOR 90 mütləq lovğalanacaq üstünlüyə malikdir. Smartfon aşağıdakı optika dəstindən istifadə edir:
Əsas kamera: 200 MP, f/1.9, 1.4″, 0.56 µm, PDAF (Samsung ISOCELL HP3)
Ultra-geniş bucaqlı kamera: 12 MP, 112°, f/2.2, avtofokus, 122° baxış bucağı
Dərinlik sensoru: 2 MP, f/2.4
Selfi kamerası: 50 MP, f/2.4, 100°
200 MP kamera standart vəziyyətdə 12,5 MP şəkillər çəkir. ISOCELL HP3 sensoru, 16 pikseli 1 piksel kimi birləşdirməkdən yararlanır. Yaxşı işıqda fotoşəkillər əla görünür, heç bir detal və ya kəskinlik itkisi yoxdur. Xüsusilə, kameranın günəş işığı altında arxadan gələn gur işıqlandırmadan əziyyət çəkməməsi və ağ balans çox dəqiq olması diqqət çəkir. Yaxından obyektləri çəkərkən təbii bokeh effekti də kamera sensorunun texniki baxımından güclü olduğunu qarşımıza qoyur. Hiss edə biləcəyiniz yeganə şey rənglərin həddindən artıq doyması ola bilər, lakin bunu kameranın rəng filterlərindən dəyişməklə rahatlıqla həll edə bilirsiniz.
Yüksək təsvir ölçüsü sayəsində əsas kamera həm də 2x rəqəmsal böyütmə keyfiyyəti təklif edir ki, bu da sensor səviyyəsində 2 qat optik yaxınlaşdırmanı mümkün edir.
Gündüz vaxtı keyfiyyətinə görə əsas kameradan heç də geri olmayan geniş bucaqlı obyektiv də inamla çıxış edir. Diqqətlə baxdıqda, künclərdə bulanıqlıq və daha az detal görə bilərsiniz, lakin ümumilikdə geniş bucaqlı obyektiv seqmentinə görə yaxşı nəticə göstərir.
Günəş batdıqda və işıqlandırma şəraiti pisləşdikdə, HONOR 90 da ideal nəticəsini sabit saxlamağı bacarır. Əsas kamerada OIS yoxdur lakin, çox qaranlıq səhnələrdə belə aydın fotoşəkillər üçün kifayət qədər işığı udma qabiliyyəti mövcuddur. Gecə rejimində çəkiliş bir neçə saniyə çəkir. Aydın məsələdir ki, daha çox işığın udulmasına imkan yaradan bu xüsusiyyət görüntünü zənginləşdirir. Şəkillər çox da bulanıqlaşmadan əziyyət çəkmir, təəccüblü dərəcədə kəskin və yaxşı dinamik diapazon göstərir. Ağ balansının təyin edilməsi isə mövcud işıq mənbələrindən asılıdır, kamera bunu həmişə dəqiq müəyyən edə bilmir, lakin adətən nəticələr qənaətbəxş olur.
Lakin 12 MP geniş bucaqlı kamera əsas modulla gecə çəkilişlərində çox da ayaqlaşa bilmir. Əksər hallarda, ağ balansı tamamilə pozulur, bundan əlavə, sensor kifayət qədər işıq toplamaq iqtidarında olmadığından, nəticədə fotoşəkillər rəngin bərpası və detalları baxımından geri qalır.
50 MP selfi kamerası son dərəcə geniş baxış sahəsinə malikdir və bu, qrup şəklində fotoşəkillər çəkməyə belə imkan verir. Hazır olaraq, təsvir ölçüsü 12.5 MP-dir. Görüntülər yüksək keyfiyyətlidir və istəsəniz HDR ilə dolğun görüntülər ortaya qoya bilər. Ön hissə həmçinin EIS ilə 4K 30FPS video çəkilişini dəstəkləyir.
Arxa kameradan video çəkiliş həm əsas, həm də ultra geniş bucaqlı kameralarda 4K 30FPS və 1080P 60FPS-dir. Siz video qeydə alarkən 2x rəqəmsal böyütmə arasında problemsiz keçid edə bilərsiniz. HONOR 90 arxa işığı yaxşı idarə edir və rəqəmsal sabitləmə olan EIS yaxşı işləyir. Buradakı video keyfiyyəti öz sinfində həqiqətən ən yaxşılardan biridir.
Yekun qiymətləndirmə
HONOR 90 modelinin üstünlükləri:
Cəlbedici dizayn
İncə çərçivələrə malik qabaqcıl OLED ekran
Yaxşı batareya ömrü və sürətli şarj
Başlanğıc versiyada 8/256 GB yaddaş
Oyunlar üçün yararlı performans
Foto/video çəkiliş üçün yaxşı kamera
Google xidmətlərinin mövcudluğu
HONOR 90 modelinin mənfi cəhətləri:
Tam plastik korpus
Telefonun rəsmi suya davamlılıq olmaması
Stereo dinamiklərin ləğvi
Yeniləmələrlə ən uzun dəstək deyil
HONOR 90, markanı əvvəldən məşhur edən smartfonlardan sonra modelləşdirilmişdir. O, cəlbedici dizayna, premium ekrana, yüksək gücə, yaxşı batareya ömrünə və öz sinfində ən yaxşı kameralardan birinə malikdir. Təbii ki, HONOR 70 ilə bənzər imkanlara sahib olsa da ələ aldıqda HONOR 90 daha premium hissiyat yaşatmağı bacarır. Yenə də, almaq tövsiyə oluna bilən maraqlı bir cihazdır. Düşünürük, sizi heç də məyus etməyəcək.
