Kameralar ilə kibercinayətkarlıq hallarının artmasına dair son zamanlar çox qəribə faktlar ortaya çıxır. Xatırlayırsınızsa, bir müddət əvvəl onlayn konfranslarda iştirakçıların taxdığı eynəklərin ekrandakı görüntünü əks etdirməsindən məxfi məlumatları aşkarlayan sistemlərin mövcudluğundan danışmışdıq. Həmin metodla kibercinayətkarlıqdan müəyyən qədər yayınmaq mümkündür. İndi isə yeni paylaşılan araşdırmaya görə termal kameralar vasitəsilə şifrələrin sındırılması çox rahatlıqla həyata keçirilə bilər.
Termal kameralar ilə 6 simvolluq şifrələrin sındırılması bütün sınaqlarda 100% uğurlu nəticə vermişdir
Tədqiqatçıların hazırladığı ThermoSecure adlı süni intellekt sistemi termal kameralar ilə şifrələrin sındırılmasını həyata keçirməkdə istifadə olunub. İstər klaviatura, istər telefon, istər hansısa bina və ya mənzil girişlərində istifadə edilən kodlu sistemlər fərq etmədən ThermoSecure proqramı termal kameralar ilə şifrənin sındırılmasını həyata keçirə bilər. Sınaqlar zamanı 20 saniyə sonraya qədər yazılan şifrələrdən 86%-i, 30 saniyə sonraya qədər 76%-i, 1 dəqiqə sonraya qədər 62%-i sındırılıb.
Şifrələrin sındırılmasının uğurlu olub-olmaması isə şifrə uzunluğu ilə əlaqədardır. 6 simvolluq şifrələrin sındırılması bütün cəhdlərdə 100% uğurlu nəticə vermişdir. 12 simvolluq şifrələr 82% uğurlu olub, 8 simvolluq şifrələr isə 93% ehtimalla sındırılmışdır. Tədqiqatın baş yazarı Mohamed Khamis, termal kameraların ucuz olması və maşın öyrənməsi ilə bu tip şifrələri sındıra bilən alqoritmlərin daha əlçatan olması ehtimalına görə insanları diqqətli olmağa çağırıb.
ThermoSecure adlı süni intellekt əsaslı proqram təminatının əsas işləmə prinsipi isə çox sadədir. Barmağınızla toxunduğunuz düymələrdə müəyyən istilik fərqi yaranır. Termal kameralar isə həmin istilik fərqini təyin edə bildiyi üçün hansı düymələrə basıldığı və hansı ardıcıllıqla basıldığını ThermoSecure proqramına hesablada bilər. Mohamed Khamis, uzun şifrələrdən istifadə etmədiyiniz təqdirdə arxa işıqlandırmalı klaviaturalar müəyyən qədər köməyinizə çata bilər.
