Məlum məsələdir ki, heç bir əlavə mexaniki aqreqatlara sahib olmayan elektromobillər batareyadan aldığı enerjini birbaşa elektrik mühərrikinə ötürərək çox qısa vaxt ərzində sürətlənir. Məhz bu səbəbdən 0-100 km/s sürətlənmədə ənənəvi daxili yanma mühərrikli idman avtomobilləri geridə qalırlar. Belə ki, “Stuttgart GreenTeam” tərəfindən ən tez 0-100 km/s sürətlənən elektromobil ünvanı üçün Ginnesin Dünya Rekordu təzələnib. Lakin hazırlanmış elektromobil tamamilə rekordu əldə etmək məqsədilə hazırlandığından normal elektromobillərdən xeyli fərqlənən üsluba malikdir.
0-100 km/s sürətlənmə rekordu qıran elektromobil sadəcə 145 kq çəkiyə sahibdir
Tamamilə karbon-fiber materialdan hazırlanmış gövdəsi F1 bolidi kimi 1 nəfər pilotun idarə etməsi üçün hazırlanıb. Tam ötürməli sistemə malik olduğu bildirilən elektromobil 180 kVt və ya 242 at gücü hasil edən elektrik mühərrikləri ilə hərəkətə gəlir. 242 at gücü sizə az görünə bilər, lakin elektromobilin çəkisinin də çox az olduğunu nəzərə almaqda fayda var. Elektromobillər üçün 0-100 km/s sürətlənmə rekordu budndan əvvəl 2016-cı ildə 1.523 saniyə ilə qeydə alınmışdı. Lakin “Stuttgart GreenTeam” tərəfindən hazırlanmış bu elektromobil həmin nəticəni 1,461 saniyəyə qədər azalda bilib.
Ştutqart Universitetinə aid olan “Stuttgart GreenTeam” komandası dünya rekordu ilə bağlı videonu YouTube kanalı üzərindən yayımlayıb. Rekordun iyun ayında qırılması planlaşdırılsa da sınaqlar zamanı qəza edildiyi üçün rekord sürüşü ötən ay baş tutub. Həmin video ilə aşağıdan tanış ola bilərsiniz.
