Son dövrlərdə texnologiya sahəsinin inkişafı ilə əlaqədar olaraq Azərbaycanda nağdsız ödəniş sistemlərinin payı artıb. Belə ki, bu barədə epoint.az mənbəsi araşdırma edib. Araşdırma nəticəsində məlum olub ki, ölkəmizdə əvvəlki illər ilə müqayisədə cari il ərzində ödəniş sistemlərində ciddi dəyişikliklər mövcuddur. Ölkəmizdə 2022 və 2023-cü illər ərzində ödəniş seçimlərində əhəmiyyətli dəyişikliklər meydana gəlib. Qeyd edək ki, ötən aya nəzərən bu ay dövriyyədə olan ödəniş kartlarının sayı 219 min ədəd artmışdır. Yekunda isə dövriyyədə 14 milyon 465 min ədəd ödəniş kartı olduğu məlum olub. Bu barədə Azərbaycan Mərkəzi Bankı məlumat yayıb.
Ümumiyyətlə 2022-ci ildə Azərbaycanda kart ödənişləri ölkə daxilində 55,980 milyon manat təşkil edib. Bu əməliyyatların 31,787 milyon manatını nağd ödənişlər təşkil edib ki, bu da ümumi məbləğin təxminən 56,8%-ni təşkil edir. Qeyd edək ki, 2022-ci il ərzində nağdsız ödənişlərin həcmi 24,192 milyon manat təşkil edib ki, bu isə ümumi məbləğin 43,2%-ni təşkil edir. Həmçinin bu nağdsız ödənişlərin əhəmiyyətli hissəsi bankomatlar və POS-terminallar vasitəsilə həyata keçirilib. Belə ki, ötən il ölkəmizdə nağdsız ödənişlərin POS-terminallar ilə həyata keçirilən həcmi 5,803 milyon manat, Elektron ticarət ilə 18,348 milyon manat təşkil edib. Müvafiq olaraq isə bu məbləğlər 2022-ci ildə Azərbaycanda nağdsız ödəniş sisteminin 24% və 76%-ni təşkil edir.
Bununla da, əvvəlki il ilə müqayisədə cari ildə Azərbaycan nağdsız ödəniş sisteminin payı artmışdır. Ölkə daxili kart ödənişlərinin ümumi dəyəri artaraq ilk 3 ay ərzində 17,556 milyon manata çatıb ki, bu da ölkənin rəqəmsal ödəniş ekosistemində əhəmiyyətli artımın göstəricisidir. Gələcəyə baxsaq, Azərbaycan çox sürətli şəkildə nağdsız ödənişə keçid edir. Texnoloji irəliləyişlər, təkmilləşdirilmiş infrastruktur rəqəmsal ödəniş həllərinin qəbulunu daha da sürətləndirəcək. Ölkəmizdə son dövrlərdə kart ilə ödənişlərinin sayının artması texnoloji baxımdan ölkənin yüksək təmin olunması ilə də əlaqəlidir. Həmçinin son dövrlərdə bağlanılan əməkdaşlıq müqavilələri nəticəsində bir çox məşhur e-ticarət platformaları artıq ölkəmizdə fəaliyyətə başlayır. Bu isə Azərbaycan bazarında nağdsız ödənişlərin payını ciddi şəkildə artırır.
