ABB İnnovasiya Mərkəzi, İnnovasiya və Rəqəmsal İnkişaf Agentliyinin tərəfdaşlığı ilə 4-cü ABB Hakatonu (ABB Hackathon Startap Challenge) uğurla həyata keçirilib. Belə ki, ABB tərəfindən Bakı Konqres Mərkəzində keçirilən hakaton müsabiqəsi 2 gün davam edib. Nəticədə isə müsabiqəni uğurla bitirən startaplar növbəti mərhələyə keçib.
Qeyd edək ki, ideya marafonunda iştirak üçün ümumilikdə 300 dən çox startap müraciət etmişdir. Lakin seçim mərhələsi və müsahibə prosesindən sonra onlardan yalnız 70-i 4-cü ABB Hakatonu müsabiqəsində iştirak hüququ qazanıb. Beləliklə müsabiqə 20-21 May tarixlərində 70 startap və 200-dən çox komanda üzvünün iştirakı ilə baş tutmuşdur. Qeyd edək ki, ABB-nin İpoteka sahəsi üzrə rəhbəri Rüfət Abbasov, Metatesk-in CEO və təsisçisi Günay İmanzadə, ABB innovasiya mərkəzinin proqram meneceri Elnur İsazadə və UNEC inkubasiya mərkəzinin direktoru Mübariz Şahbazlı müsabiqənin münsiflər heyətini təşkil edib. Komandalar öz ideyaları üzərində işləyərək startaplarını münsiflər heyətinə təqdim etmişdir.
Yekunda isə münsiflər heyəti 70 startapdan sadəcə 25 startap seçərək ABB İnnovasiya Mərkəzinin 4-cü pre-inkubasiya proqramına qəbul etmişdir. Qeyd edək ki, 4-cü ABB Hakatonu müsabiqəsinin 25 uğurlu startapı daha bir rəqabətə daxil olacaq. 4-cü ABB Hakatonunun əsas istiqamətləri Daşınmaz əmlak məlumatlarının təhlili, rəqəmsal ipotekada müştəri təcrübəsi, virtual daşınmaz əmlak səyahəti, mənzil ekosisteminin qurulması, daşınmaz əmlak aqreqatoru lə bağlı olub. Hakatonun qalibləri öz ideyalarına işlək məhsula çevirmək, inkubasiya mərhələsinə keçid, müxtəlif sektorlar üzrə beynəlxalq təcrübəyə malik mütəxəssislərlə müzakirələr və davamlı mentor dəstəyi və təlim imkanlarına sahib olacaq. Həmçinin Pre-inkubasiya mərhələsinin sonunda 1-ci, 2-ci və 3-cü yerin qalibləri müəyyənləşərək, mükafatlandırılacaqdır.
Startap ekosistemi xəbərlərini "İnnovasiya və Rəqəmsal İnkişaf Agentliyi" ilə tərəfdaşlıq çərçivəsində oxuyursunuz.
